Saltar ao contido

George William de Saulles

Na Galipedia, a Wikipedia en galego.
Modelo:BiografíaGeorge William de Saulles
Biografía
Nacemento4 de febreiro de 1862 Editar o valor en Wikidata
Birmingham, Reino Unido Editar o valor en Wikidata
Morte21 de xullo de 1903 Editar o valor en Wikidata (41 anos)
Londres, Reino Unido Editar o valor en Wikidata
Actividade
Ocupaciónescultor, medallista Editar o valor en Wikidata
Período de actividade(Con vida en: 1899 Editar o valor en Wikidata)
Membro de
Descrito pola fonteDictionary of National Biography, second supplement (en) Traducir Editar o valor en Wikidata

George William de Saulles, nado en Birmingham o 4 de febreiro de 1862 e finado en Londres o 21 de xullo de 1903, foi un medallista e deseñador de moedas inglés.

O máis sobranceiro da súa obra son os anversos das moedas do Reino Unido na derradeira etapa do reinado de Vitoria (1837-1901) e baixo Eduardo VII (1901-1910), así como diversas moedas para os territorios coloniais británicos dese período.[1][2][3]

Traxectoria

[editar | editar a fonte]

Primeiros anos e formación

[editar | editar a fonte]

De Saulles naceu o 4 de febreiro de 1862 en Villa Street, no distrito de Aston Manor, ao norte de Birmingham. O seu avó Samuel fora un cidadán suízo que traballara no servizo da casa de Xurxo IV (1820-1830), e o seu pai, William Henry de Saulles, era un comerciante do vidro en Birmingham.[2][3]

Sendo aínda un neno comezou a súa formación artística na Birmingham School of Art, onde tivo como mestre a Mr. Taylor, e alí acadou xa varios premios. Logo foi aprendiz do gravador de cuños Mr. Wilcox, tamén en Birmingham,[2] con quen aprendeu a gravar grandes etiquetas para produtos comercializados na cidade.[1][3][4]

Carreira profesional

[editar | editar a fonte]
Anverso dun soberano de Eduardo VII, obra de George William de Saulles (marca: DS baixo o busto).[5]

En 1884, de Saulles trasladouse a Londres, onde traballou co gravador de cuños John H. Pinches, establecido en Oxenden Street, Haymarket. En 1888 regresou a Birmingham e traballou para o medallista Joseph Moore.[1][2][3][4]

En 1892 trasladouse novamente a Londres, para ocupar o posto de gravador xefe da Royal Mint, que quedara vacante logo do falecemento de Leonard Charles Wyon.[6] Desde ese momento e ata a súa morte encargouse da produción dos cuños para as moedas do Reino Unido e dos seus territorios coloniais, así como das medallas oficiais.[1][2][3]

Entre os anos 1898 e 1903 foi un dos expositores na Royal Academy.[6]

Vida persoal

[editar | editar a fonte]

De Saulles casou en xuño de 1884 con Myra Hill, con quen non tivo descendencia.[2][3]

O día 21 de xullo de 1903,[1] faleceu no distrito londiniense de Chiswick, logo duns días de doenza, aos seus 41 anos.[2] Foi soterrado no cemiterio do adro da igrexa de Chiswick.[3]

Obras

[editar | editar a fonte]

Medallas

[editar | editar a fonte]
Medalla ao Longo Servizo (1902), a nome da raíña Vitoria, obra de George William de Saulles.[7]

Como artesán, de Saulles encargouse do proceso completo de deseño, modelaxe e gravado da maioría dos seus cuños. Nas súas creacións deixouse influír, en certa medida, polos gravadores da Escola Francesa Louis-Oscar Roty e Jules-Clément Chaplain.[2] No entanto, nas súas producións oficiais non deixou terreo para a a innovación.[3]

A súa obra medallística privada entre 1894 e 1903 abrangue polo menos tres placas e 30 medallas, entre as que están as seguintes:[1][3][8]

  • 1899: Profesor Stokes (con J. H. Pinches).[9][10]
  • 1901: Samuel Carnegie (con J. H. Pinches).[10]
  • 1901-1910: Real Instituto de Arquitectos Británicos.[11]
  • 1902: coroación de Eduardo VII.[12]
  • 1903: Institución Nacional de Botes Salvavidas.[13]

Ademais destas, tamén gravou outras con carácter oficial, producidas na Royal Mint, entre elas:[1][3][8]

Moedas

[editar | editar a fonte]
Dólar dos Establecementos do Estreito (1903), obra de George William de Saulles.[19]

Na súa condición de gravador xefe da Royal Mint, De Saulles encargouse en primeiro lugar de realizar os cuños para a nova emisión de moedas da raíña Vitoria, en 1893, que foran deseñados por Thomas Brock. A de Saulles débeselle tamén o deseño da Britannia característico dos reversos das moedas de bronce británicas de 1895, así como o deseño das moedas emitidas a partir de 1902, logo da entronización de Eduardo VII.[1][3][8][20]

Tamén foi responsabilidade de De Saulles o deseño e o gravado dos cuños para as emisións das moedas coloniais da súa época, como o dólar de comercio británico, as moedas de cobre da África Oriental Británica (1897), as moedas da Honduras Británica (1894), o dólar británico para os territorios da India (1895), moedas para Chipre (1890) e o dólar dos Establecementos do Estreito (1903),[1][3][8] ademais doutras emisións para Terra Nova, Jersey, Australia, a Guiana Británica, o Canadá, Ceilán, Hong Kong ou Xamaica, baixo soberanía británica.[2][20]

As súa marcas de gravador nestas moedas foron DES, DS e WS.[2][20]

Outros

[editar | editar a fonte]

De Saulles realizou tamén o derradeiro Gran Selo para a raíña Vitoria (1898), así como outros moitos selos oficiais para as colonias.[8] No momento do seu falecemento estaba a preparar os modelos para os grandes selos de Eduardo VII do Reino Unido e os de Irlanda e Escocia, executados posteriormente por Frank Bowcher.[1][3]

Notas

[editar | editar a fonte]
  1. ↑ 1,00 1,01 1,02 1,03 1,04 1,05 1,06 1,07 1,08 1,09 Forrer, L. (1904).
  2. ↑ 2,00 2,01 2,02 2,03 2,04 2,05 2,06 2,07 2,08 2,09 Tout-Smith, D. (2004). "George William de Saulles, Sculptor, Designer & Engraver (1862-1903)". Museums Victoria.
  3. ↑ 3,00 3,01 3,02 3,03 3,04 3,05 3,06 3,07 3,08 3,09 3,10 3,11 3,12 Wroth, W. W. (1912).
  4. ↑ 4,0 4,1 Pinches, J. H. (1903). Páxina 311.
  5. ↑ "1 Sovereign - Edward VII". Numista.com
  6. ↑ 6,0 6,1 Pinches, J. H. (1903). Páxina 312.
  7. ↑ 7,0 7,1 "Medal, long service". Auckland War Memorial Museum.
  8. ↑ 8,0 8,1 8,2 8,3 8,4 Pinches, J. H. (1903). Páxinas 312-313.
  9. ↑ "Bronze medal commemorating George Gabriel Stokes". Science Museum Group.
  10. ↑ 10,0 10,1 Catalogue of the international exhibition of contemporary medals. American Numismatic Society. Nova York. 1911, Páxina 72.
  11. ↑ "Specimen Royal Gold Medal for the Royal Institute of British Architects 1901-10". Royal Collection Trust.
  12. ↑ "Edward VII Coronation 1902". Museums Victoria Collection.
  13. ↑ "6. Royal National Lifeboat Institution Gallantry Medal". En Besly, E. (2004). For Those in Peril. Civil decorations and lifesaving awards at the National Museums & Galleries of Wales. National Museum of Wales. Páxina 8. ISBN 0 7200 0546 9
  14. ↑ "The Queen's South Africa Medal 1899-1902". www.northeastmedals.co.uk
  15. ↑ "Ashanti Medal (1901) Arquivado 16 de febreiro de 2022 en Wayback Machine.". Forces War Records.
  16. ↑ "Transport Medal (1902) by George William de Saulles". Museum of Applied Arts & Sciences.
  17. ↑ "Victoria Meritorious Service Medal 1902-1903". Museums Victoria Collection.
  18. ↑ "Victoria Meritorious Service Medal 1902-1903". Museums Victoria Collection.
  19. ↑ "1 Dollar - Edward VII". Numista.com
  20. ↑ 20,0 20,1 20,2 Moedas deseñadas por De Saulles. Numista.com

Véxase tamén

[editar | editar a fonte]

Bibliografía

[editar | editar a fonte]

Outros artigos

[editar | editar a fonte]
Predecesor:
Leonard Charles Wyon 		Gravador xefe da Casa da Moeda de Londres (Royal Mint)
1892 - 1903 		Sucesor:
Walter Newman


Predecesor:
Thomas Brock
Moedas da libra esterlina
Autores dos anversos
1901 - 1910 		Sucesor:
Bertram Mackennal
Traído desde «https://gl.wikipedia.org/w/index.php?title=George_William_de_Saulles&oldid=6718923»