Castelón de Castañoso

Castelón de Castañoso
Parroquia	Maderne
Concello	A Fonsagrada
Provincia	Lugo
Comunidade autónoma	Galiza
Id. catálogo	GA27018280
Cronoloxía
Datas de ocupación	S. I actual
Períodos de escavación	escavado parcialmente
Estado actual	en estudo
Véxase tamén
Castros de Galiza

Castelón de Castañoso é un castro fortificado no cumio dun esporón de difícil acceso formado polo regueiro do Val de Barreiro e o río Covas na Fonsagrada. Dispoñía de profundos foxos que o facían case inexpugnable e só accesible a pé. Está situado a uns 500 metros de altitude sobre o nivel do mar.

Historia

Dende os anos 1980 falábase da existencia de restos de paredes abovedadas no castro de Castañoso. A información apareceu publicada nunha guía turística da Fonsagrada citando como fonte informacións locais.

Descrición

Pedra Formosa da sauna de Castañoso.

O castro non foi escavado e só se estudou unha pequena parte na que apareceu unha sauna castrexa nun souto de difícil acceso coñecido por Campo do Castro, sendo un dos poucos exemplos desta construción no actual territorio galego. A pedra formosa atopouse fracturada e a construción, cunha gran falsa bóveda, corría perigo de derrubamento. No verán de 2015 comezaron os traballos de restauración da sauna polo Museo da Fonsagrada por mor do seu perigo de derrubamento. A construción consta dunha cámara de combustión (forno), unha sala de vapores e unha vivenda compartimentada, máis alta e complexa do habitual. Unha canle traballada na pedra e por unha ponte de madeira achegaba a auga a unha pía. Ademais da pedra formosa atopáronse unha fíbula de bronce e cerámica. Crese que estas construcións, de orixe prerromana, eran de uso ritual e non lúdico ou hixiénico.

Véxase tamén

Outros artigos

• Castros de Galicia
• Cultura castrexa