A tempada 2019-2020 do Campionato Nacional foi a edición número 62 da máxima competición de clubs do rugby en Portugal. A pandemia por COVID-19 detivo a competición en marzo mentres se levaba a cabo a segunda fase e o campionato foi declarado nulo sen campión nin descensos.
O torneo contou con 12 equipos participantes: os 8 que competiron na edición anterior (é dicir, finalmente non houbo descensos) e 4 equipos ascendidos (1º, 2º, 3º e 6º na segunda categoría). Estes 12 equipos foron: o Agronomia, o Belenenses, o Técnico, o CDUL, o Direito, o CDUP, o Cascais e o Académica da edición anterior, e o Montemor, o Benfica, o Lousã e o CRAV da segunda categoría. O CRAV ascendeu polas renuncias a ascender do Évora e do Caldas, 4º e 5º na segunda división o ano previo.
O formato de competición contaba con tres fases.
Na primeira había doce equipos repartidos en tres grupos de catro. A repartición dos equipos entre os tres grupos fíxose atendendo á súa clasificación na edición anterior. En cada grupo de catro equipos se disputaron seis xornadas, e os dous mellores equipos de cada grupo pasaron a loitar polo título mentres que os dous peores equipos de cada grupo pasaron a loitar pola permanencia na segunda fase do torneo.
Na segunda fase os equipos estaban separados en dous grupos de seis equipos cada un. No "Grupo A" estiveron os seis mellores equipos da primeira fase e no "Grupo B" os seis peores. En cada grupo desta segunda fase tiñan que disputarse dez xornadas.
Na terceira fase os catro mellores equipos do "Grupo A" disputarían as eliminatorias polo título, que consistían en semifinais e final, todas a encontro único.