Anosmia

Anosmia
Clasificación e recursos externos
Debuxo da vista anatómica lateral da mucosa inflamada
Advertencia: A Wikipedia non dá consellos médicos. Se cre que pode requirir tratamento, por favor, consúltello ao médico.

A anosmia é a perda total do olfacto. En galego hai varios sinónimos como aosmia, anodmia, anosfrasia, anosfresia ou anestesia olfactiva, recollidos no Diccionario galego de termos médicos da Real Academia de Medicina e Cirurxía de Galicia; a hiposmia é un sinónimo parcial, referido á diminución do olfacto, causada por danos ou lesión no nervio olfactivo, obstrución das fosas nasais ou outras doenzas.

Síntomas

Ademais da incapacidade para sentir os cheiros, a anosmia tamén prexudica o gusto. O motivo é que a lingua é capaz de identificar as seguintes características: sabor doce, salgado, acedo, amargo e umami ou glutamato.^{[Cómpre referencia]} Como non é posíbel diferenciar unha substancia da outra (unha lambetada con azucre doutra sen el, por exemplo) a través do olfacto, o paciente con anosmia identificará as dúas substancias como iguais.

Tipos de anosmia

Existen dous tipos de anosmia: a parcial e a permanente:

• Parcial: pódese tratar e curar. Ás veces prodúcese pola obstrución das vías nasais debido a unha enfermidade alérxica ou inflamación da lingua. O paciente perde o olfacto durante un período determinado e despois recupera. Causa comúns de anosmia parcial son a gripe, que causa danos leves aos nervios olfactivos, ou a Covid-19.
• Permanente: hoxe en día aínda non ten cura. Normalmente prodúcese por danos graves nos nervios olfactivos como resultado de accidentes (de tráfico e outros), infeccións graves nos nervios da cara ou radioterapia durante o tratamento do cancro.

Causas

Un grande número de condicións poden causar perda do olfacto, entre elas as máis comúns son:

• Infección do tracto respiratorio superior (por exemplo, sinusite ou arrefriado)
• Demencias (Alzhéimer, Párkinson, Vascular, Lewy)
• Rinite alérxica
• Idade avanzada (presbiosmia)
• Tumores (pólipos, glioma, meninxioma ou cancro na vía olfactiva)
• Traumatismo craneoencefálico, con dano no óso etmoides
• Latroxénica (despois da cirurxía nasal ou por fármacos como enalapril, risperidona e fármacos intranasais…)
• Toxinas (cinc, cadmio, intoxicación por manganeso…)
• Alcoholismo ou tabaquismo prolongado
• Queimaduras e inhalación de fume
• Enfermidades autoinmunes como esclerose múltiple, miastenia grave, sarcoidose ou granulomatose con polianxiite
• Malformación (como atresia do cloasma )
• SARS-CoV-2 (virus CoViD-19)

Prevención

Para as persoas que non teñen doenzas, sempre é bo evitar accidentes que poidan afectar a rexión da cabeza. A persoa con enfermidade debe ter especial coidado co gas de cociña, os alimentos estragados e a depresión.