O aeroporto internacional Avram Iancu Cluj (IATA: CLJ, ICAO: LRCL) é un aeroporto que serve á cidade de Cluj-Napoca, en Romanía. Inicialmente era coñecido como aeroporto de Someșeni, xa que se atopa situado na área de Someseni, a 9 km ao leste do centro da cidade. O aeroporto foi bautizado na honra do revolucionario romanés Avram Iancu.
En termos de tráfico de pasaxeiros, o aeroporto de Cluj é o segundo máis concorrido de Romanía, tras o aeroporto de Bucarest-Henri Coandă, pasando polas súas instalacións 1 880 171 pasaxeiros no ano 2016. O seu tamaño e situación (na ruta europea E576 e preto da autoestrada A3) convérteno no aeroporto máis importante da rexión histórica de Transilvania.
