Džanan Musa

Džanan Musa
	Real Madrid – No. 31
Información persoal
Nacemento	8 de maio de 1999 (24 anos); Bihać, Bosnia e Hercegovina
Altura	2,06 m (6 ft 9 in)
Peso oficial	94 kg (208 lb)
Posición	Ala
Información da carreira
NBA Draft	2018 / Rolda: 1 / Elección: 29; Por Brooklyn Nets
Internacional	Bosnia e Hercegovina
Carreira	2015−presente
Historial de equipos
	KK Cedevita (2015–2018); Brooklyn Nets (2018–2020); Anadolu Efes (2021); Breogán (2021–2022); Real Madrid (2022–presente)

Džanan Musa, nado o 8 de maio de 1999 en Bihać, é un xogador bosníaco de baloncesto profesional. Seleccionado na primeira rolda do Draft da NBA polos Brooklyn Nets, xoga na posición de ala cunha altura de 2,06 m. Tras finalizar a súa etapa na NBA e xogar no Anadolu Efes da Euroliga e no Río Breogán da Liga ACB, actualmente xoga para o Real Madrid.

Traxectoria[editar | editar a fonte]

Nado en Bihać, ao noroeste de Bosnia e Hercegovina, Musa comezou a xogar de pequeno ao fútbol antes de decidir dedicarse ao baloncesto. Durante a súa etapa xuvenil formou parte do KK Bosna, do KK Koš de Saraxevo e finalmente, desde 2014, do KK Cedevita croata.^[1] O 15 de outubro de 2015 fixo o seu debut na Euroliga con tan só 16 anos, sendo un dos xogadores máis novos en debutar na historia da competición.^[2] Neste primeiro encontro, disputado ante o Olympiacos, disputou preto de cinco minutos nos que anotou catro puntos. Durante a súa etapa no equipo croata gañou tres ligas e tres copas croatas e unha Supercopa da Liga do Adriático. A nivel individual en 2018 foi recoñecido no mellor quinteto da Liga do Adriático, así como xogador máis prometedor tanto desa competición como da EuroCup, na que fixo unha media de 10,5 puntos e 3,2 rebotes por encontro.

Tras finalizar a súa estancia en Croacia, Musa presentouse ao Draft da NBA de 2018, sendo escollido o 21 de xuño de 2018 na primeira rolda (29ª posición) polos Brooklyn Nets.^[3] Após dúas temporadas no equipo neoiorquino, onde fixo unha media de 4,3 puntos e 1,9 rebotes por partido, o 13 de xaneiro de 2021 volveu a Europa tras asinar co Anadolu Efes SK turco.^[4] Tras finalizar a temporada, o 21 de xullo de 2021 anunciouse a súa fichaxe polo Río Breogán da Liga ACB.^[5] No equipo de Lugo realizou unha gran tempada e converteuse no primeiro xogador dun club galego en gañar o MVP da ACB, despois de ser o xogador con máis valoración da liga (23,1 de media) e o máximo anotador da competición, cunha media de 20,1 puntos por encontro.^[6]