Xosé Henrique Rodríguez Peña

Na Galipedia, a Wikipedia en galego.
Xosé Henrique Rodríguez Peña
Nacemento 24 de outubro de 1942
Falecemento 13 de agosto de 2006
Nacionalidade España
Ocupación político e arquitecto
editar datos en Wikidata ]

Xosé Henrique Rodríguez Peña, nado en Ourense o 25 de outubro de 1942 e finado en Vigo o 13 de agosto de 2006, foi un arquitecto e político galego.

Traxectoria[editar | editar a fonte]

Estudou na Facultade de Ciencias da Universidade de Santiago de Compostela e licenciouse en Arquitectura pola Escola Superior de Arquitectura de Madrid, especializándose na restauración de monumentos.

Nos anos 60 participou, sen afiliación política, no movemento estudantil contra a ditadura e presentouse ás eleccións municipais de 1979 a Ourense nas listas de Unidade Galega como membro do Partido Galeguista. Foi elixido secretario xeral do Partido Galeguista no III Congreso celebrado en decembro de 1983. No Congreso extraordinario celebrado o 19 de febreiro de 1984 propuxo a integración do PG en Coalición Galega, decisión que se adoptou por 92 a 88 votos.

Membro de Coalición Galega (CG) desde a súa fundación, ocupou o cargo de secretario do partido na área de Acción Municipal en 1985. Nas eleccións autonómicas de 1985 foi elixido como deputado por esta formación. Dous anos despois, en xaneiro de 1987 foi impulsor e membro fundador do Partido Nacionalista Galego (PNG), organización creada como escisión de Coalición Galega. Este novo partido foi peza chave na moción de censura contra Xerardo Fernández Albor que levou á presidencia da Xunta o socialista Fernando González Laxe. Nese primeiro goberno tripartito Xosé Henrique Rodríguez Peña foi nomeado conselleiro de Pesca.

En 1989 non sae elixido deputado no Parlamento de Galicia. A partir dese momento o PNG-PG inicia as xestións para incorporarse no seo do BNG. Nas eleccións municipais de 1991 saíu escollido concelleiro na lista do BNG por Ourense e converteuse en voceiro dos nacionalistas no consistorio.

O 7 de xuño de 1992 foi elixido secretario xeral do Partido Nacionalista Galego durante a celebración do seu IV Congreso. Nas eleccións autonómicas de 1993 foi escollido deputado por Ourense, que revalidou nas de 1997 e de 2001.

Presidiu a delegación ourensá do Colexio de Arquitectos. Ademais, foi vicepresidente do Ateneo ourensán e membro do padroado do Museo do Pobo Galego.

Na altura da súa morte era membro do Consello Nacional do BNG e secretario xeral do PNG. A Fundación Galiza Sempre creou na súa homenaxe un premio bianual que leva o seu nome e que se concede a traballos de rehabilitación.


Predecesor:
Xoán Manuel Páramo Neira
 Escudo de Galicia.svg
conselleiro de Pesca
 
1987-1989
Sucesor:
Henrique López Veiga

Datos persoais[editar | editar a fonte]

Estivo casado e tivo catro fillos.

Como arquitecto, foi autor de traballos sobre arquitectura visigoda e románica e realizou o seu traballo de especialización sobre o mosteiro de Oseira.

Faleceu na clínica Povisa de Vigo, dun cancro de vexiga. Foi incinerado en Ourense.