Río Liffey

Río Liffey
Vista do río Liffey atravesando a cidade de Dublín.
País	Irlanda
Lonxitude	125km
Desembocadura	Mar de Irlanda

O Río Liffey (en irlandés An Life) é un río de Irlanda que flúe atravesando o centro da cidade de Dublín. Ten unha lonxitude de preto de 125 quilómetros e nace no monte Kippure, no condado de Wicklow. Despois percorre o condado de Kildare antes de chegar ó de Dublín. As súas augas desembocan na baía de Dublín, no Mar de Irlanda.

Nome

O nome orixinario do río era An Ruirthech, que significa "corredor rápido (ou forte)". A verba Liphe (ou Life) referíase orixinariamente ao nome da chaira pola que corría o río, pero co tempo chegou a referirse ao río en si mesmo. Tamén se lle coñeceu como o Anna Liffey, posiblemente tralo préstamo lingüístico do irlandés Abhainn na Life.

Percorrido e sistema

O río Liffey emerxe entre Kippure e Tonduff nas montañas de Wicklow. Percorre uns 125 km a través dos condados de Wicklow, Kildare e Dublín antes de desembocar no mar de Irlanda, na Baía de Dublín.

Afluentes

O sistema do Liffey inclúe ducias de ríos menores e regatos, entre os que se atopan o Shankill, o Brittas, o Painestown, o Water, o Carmac, o Bradoge, o Poddle e o Dodder.

Asentamentos

Entre as vilas asentadas ao longo do río están Ballymore Eustace, Athgarvan, Kilcullen, Newbridge, Caragh, Clane, Celbridge, Leixlip e Lucan antes de chegar á cidade de Dublín.

Galería de imaxes

Paseo fluvial do Liffey en Dublín.   O Liffey en Dublín á noite.   A ponte coñecida como Ha'penny Bridge.   O barco Jeanie Johnston no Liffey.   Vista do río Liffey.