Noemí Casquet

Noemí Casquet

Biografía
Nacemento	7 de febreiro de 1992 Sabadell, España
Datos persoais
País de nacionalidade	Española
Educación	Universidade Autónoma de Barcelona
Actividade
Ocupación	xornalista, escritora
Lingua	Lingua castelá
Páxina web	noemicasquet.com

Noemí Casquet, nada en Sabadell o 7 de febreiro de 1992, é unha xornalista e escritora española especializada en divulgación sexual e investigadora sobre sexualidade ancestral. Foi presentadora de programas de televisión e en plataformas online, e participou como redactora e columnista de medios de comunicación recoñecidos. É cofundadora e directora de Santa Mandanga, a primeira plataforma de educación sexual explícita.

Leva máis de dez anos tratando temáticas como o sexo, a antropoloxía sexual, o feminismo, as relacións afectivas, o colectivo LGTBI e a loita social. Ten un distintivo discurso cheo de forza e rebeldía que a converteu nun referente dentro da sexualidade, o feminismo e as relacións non convencionais. Grazas ás redes sociais, Casquet logrou captar un gran número de seguidores en Instagram e YouTube, a quen trata de liberar do sistema establecido a través dun estilo de comunicación natural e próximo.

Traxectoria

Carreira profesional

Casquet colaborou con varios medios de comunicación, entre eles, como columnista en La Vanguardia e tamén con El Mundo, El Español e Europa Press. Foi entrevistada por El País e por El Periódico, entre outros. Neles falou de temas como o poliamor, o sexo ou as diferenzas entre homes e mulleres en relación coa sexualidade. Colaborou en varias ocasións en emisións de radio en RTVE (Play Radio) falando do seu libro “Cuerpos”, en Radio Euskadi describindo o concepto do sexo como “unha arma de revolución masiva” e en Cadena Ser - Radio Cartagena falando de como as mulleres lle agradecen cambiarlles a súa vida sexual.

Como presentadora de televisión, dende 2021 presenta o programa “Llámalo X”, producido por RTVE en colaboración con Dadá Films and Entertainment). Nel realiza entrevistas relacionadas co ámbito do xénero e a sexualidade, e trata cuestións como o poliamor, as novas masculinidades, a sexualidade trans ou a asexualidade.

Tamén participou en programas como La Resistencia (Movistar+) e Adolescents XL (TV3), e en podcasts como o Podium Podcast de Alex Fidalgo e o Bego Beristain.

Noemí Casquet presentou ademais o Salón Erótico de Barcelona de 2019. En 2020 participou no evento TEDTalk x UCM (El Futuro), en que salientou, desde a súa experiencia, a necesidade da liberación e a naturalización do sexo.

En 2022 Atresmedia fará unha adaptación televisiva da triloxía “Zorras, Malas y Libres”. Varias fontes confirmaron que a serie se empezará a rodar ese ano.

«Haberá moito sexo. Porque divulgaremos sobre sexualidade. Porque terá esa base feminista tan esencial. Porque apostaremos, como sempre, pola diversidade relacional, de xénero e sexual». Noemí Casquet

Publicacións

Noemí Casquet leva escritas sete novelas eróticas (unha triloxía, unha biloxía e dúas novelas), que presentou por toda España. Con elas tivo éxito tamén en América, en concreto, coa xira da súa biloxía "Cuerpos y Almas" na Feira Internacional do Libro de Guadalaxara (México) de 2021. A biloxía publicouse na Arxentina, México, Colombia, Chile e nos EUA (en español).

Mala Mujer (Lunwerg - Grupo Planeta, 2019)

No seu primeiro libro, a xornalista analiza as etiquetas de identidade de xénero. A novela menciona temas como a identidade sexual, o ciclo menstrual (e a súa relación co ciclo lunar), a masturbación, o feminismo, a sexualidade e o amor.

Zorras, Malas y Libres (Ediciones B, Penguin Random House, 2020)

Esta triloxía supuxo a consolidación da carreira de Noemí Casquet como novelista. Alicia, Diana e Emily, as tres protagonistas, coñécense nun momento clave das súas vidas e deciden formar un club para cumprir as súas fantasías sexuais.

Cuerpos y Almas (Ediciones B, 2021)

Esta biloxía trata a identidade e o desexo a través dunha historia chea de paixón, erotismo e profundidade. A obra, segundo Casquet, “ten moito dela, da relación que tivo ao longo da súa vida cos homes”, e “non vai deixar a ninguén indiferente”. A autora tamén declarou:

«A primeira parte da biloxía é “Cuerpos”, e a segunda e a que publiquei recentemente é “Almas”. Con eles busco a aceptación da luz e a sombra que todos os seres humanos temos. As portadas xa dan unha pista: a de “Cuerpos” mostra a escuridade e a introspección nas entrañas dunha muller, mentres que a de “Almas” ensina a procura da luz e o poder saír de toda esa lama. Tamén quero que nos cuestionemos o que está ben e o que está mal porque é unha liña tan fina que moitas veces non sabemos identificar».