Jean Pierre Droz
| Nome orixinal | (fr) Jean-Pierre Droz  |
|---|---|
| Biografía | |
| Nacemento | 1746 La Chaux-de-Fonds |
| Morte | 1823 (76/77 anos) París, Francia |
| Datos persoais | |
| País de nacionalidade | Suíza Francia |
| Actividade | |
| Ocupación | medallista |
| Lingua | Lingua francesa |
| Familia | |
| Fillos | Jules-Antoine Droz (pt)  |
| Cronoloxía | |
| 4 de marzo de 1823 | Funeral
|
 | |
Jean Pierre Droz, nado en La Chaux-de-Fonds, no cantón suízo de Neuchâtel, o 17 de abril de 1746, e finado en París o 2 de marzo de 1823, foi un medallista, deseñador de moeda e inventor de orixe suíza e nacionalizado francés.[1][2][3]
É o pai do escultor Jules Antoine Droz (1804-1872).[2][4]
Traxectoria[editar | editar a fonte]
Jean Pierre Droz era fillo de Daniel Droz, un fabricante de apeiros agrícolas, e de Suzanne Esther Brandt. Do seu pai aprendeu desde moi novo as primeiras nocións do traballo con metais, que complementou cos estudos de deseño e de gravado. Aos 18 anos, en 1764, marchou a París, onde cultivou os seus dotes como gravador.[5]
Un dos seus primeiros traballos coñecidos é unha medalla de 1780 para conmemorar a alianza de Lois XVI co bispado de Basilea.[6]
En 1786, o Ministerio de Finanzas francés encomendoulle gravar para Lois XVI un novo modelo de escudo de 60 soldos no marco da reforma monetaria emprendida polo ministro Charles Alexandre de Calonne (1734-1802). Porén, esta moeda non chegou a entrar en circulación e dela cuñáronse só uns poucos exemplares de proba.[2][6]
En Inglaterra foi empregado durante dous anos do destacado industrial e home de negocios Matthew Boulton (1728-1809), quen requiriu dos seus servizos para mellorar a calidade das moedas privadas emitidas pola compañía Boulton and Watts na ceca de Soho, en Birmingham.[7] Alí encargouse ademais da cuñaxe de moeda de cobre para a circulación en Inglaterra e nas súas colonias. En 1789, Droz ideou un colar para a cuñaxe dos cantos das moedas e asegurar a súa forma circular que, malia non ser axeitado para un gran número de moedas, se mantivo en uso nos anos posteriores na Soho Mint.[8] En Inglaterra foi escollido membro da Royal Birmingham Society of Artists e adquiriu unha grande notoriedade como gravador.[2][6][9]
Entre outros traballos, en Birmingham encargouse así mesmo, en 1791, da cuñaxe dos monneron, gravados por Augustin Dupré (1748-1833), que se utilizaban en Francia durante a República.[10] A el débeselle tamén unha innovación que permitía multiplicar o número de cuñaxes realizadas con cada cuño, que foi aplicada tamén na impresión dos billetes coñecidos como assignats.[11][12]
En 1799 regresou a París co cargo de conservador de moedas e medallas do Directorio. [6] En 1802 foi ascendido a Administrador Xeral de Moedas e Medallas de Francia, na Monnaie de Paris, e dous anos máis tarde Napoleón nomeouno conservador do Museo da Casa de Moeda de París, cargo que exerceu ata 1814.[2][13]
En 1810 gañou nun concurso que lle permitiu encargarse dos deseños dunha nova serie de moeda circulante francesa, a partir do cal elaborou unhas pezas de proba da moeda de cinco francos de prata a nome de Napoleón I. Esta moeda, caracterizada polo busto do emperador nos seus anversos, é recoñecida como a súa obra máis significativa e dá comezo a unha serie monetaria con valores en ouro de ata 100 francos, baixo a denominación de Napoleón.[2][13]
Recoñecementos[editar | editar a fonte]
Marcas de artista de Jean Pierre Droz[editar | editar a fonte]
Nas moedas e medallas da súa responsabilidade, Droz gravou a modo de sinatura algunha das seguintes abreviaturas:[1]
- DROZ
- DR.F.
- D.F.
- J.P.D.
- J.D.
- DROZ F.
- J.P.DROZ F.
Notas[editar | editar a fonte]
- ↑ 1,0 1,1 "Droz, Jean-Pierre". En Forrer, L. (1904). Páxinas 618-628
- ↑ 2,0 2,1 2,2 2,3 2,4 2,5 "Jean-Pierre Droz". En Jeanneret, F.; Bonhôte, J. (1863). Páxinas 265-269
- ↑ Molard, C. P. (1823).
- ↑ "Droz, Jules Antoine". En Forrer, L. (1904). Páxina 628
- ↑ "Droz, Jean-Pierre". En Forrer, L. (1904). Páxina 618.
- ↑ 6,0 6,1 6,2 6,3 "Droz, Jean-Pierre". En Forrer, L. (1904). Páxina 619.
- ↑ Dick, M. et al. (2013). Matthew Boulton: Enterprising Industrialist of the Enlightenment. Páxina 134. ISBN 978-1-4094-2218-1
- ↑ Tungate, S. "Droz's Collar. An Innovation in Minting Arquivado 07 de setembro de 2019 en Wayback Machine.". Soho Mint.
- ↑ Flynn, B. (2014). A Place for Art: The story of the Royal Birmingham Society of Artists. Royal Birmingham Society of Artists. Páxina 52. ISBN 978-0993029400
- ↑ Torres, J. (2012). "Auge y caída de la acuñación a volante. Jean-Pierre Droz y Philippe Gengembre". En Revue Numismatique. Nº 168. Páxinas 319-362.
- ↑ Albigès, L-M. (2005). "De lìnflation à la terreur monétaire: Assignats de janvier 1792". En L'Histoire par l'image.
- ↑ "The quest for the unforgeable document". En Hunnisett, B. (2018). Engraved on Steel. The History of Picture Production Using Steel Plates. Routledge. ISBN 978-1-138-31138-1
- ↑ 13,0 13,1 "Droz, Jean-Pierre". En Forrer, L. (1904). Páxina 621.
- ↑ "Droz, Jean-Pierre". En Forrer, L. (1904). Páxina 621.
Véxase tamén[editar | editar a fonte]
 |
Wikimedia Commons ten máis contidos multimedia na categoría: Jean Pierre Droz  |
Bibliografía[editar | editar a fonte]
- Forrer, L. (1904). Biographical Dictionary of Medallists. Vol. 1. Spink & Son. Londres.
- Jeanneret, F.; Bonhôte, J. (1863). Biographie Neuchâteloise. Tomo I. Locle. Impr. Courvoisie.
- Molard, C. P. (1823). Notice sur les diverses inventions de feu Jean-Pierre Droz, graveur-mécanicien : relatives à l'art du monnoyage, ainsi qu'à plusieurs autres branches d'économie industrielle. J. P. Jacob Impr. Versalles.
Outros artigos[editar | editar a fonte]
- Historia da medalla francesa
- Napoleón (moeda)
- Franco francés
- Monnaie de Paris
- Augustin Dupré
- Ceca de Soho
Ligazóns externas[editar | editar a fonte]
- "Droz, Jean Pierre Arquivado 31 de maio de 2020 en Wayback Machine.". En Répertoire de Sculpture Française.
