A tempada 2010-2011 da European Challenge Cup foi a 16ª edición da segunda competición continental do rugby europeo. Como viña sendo habitual nos últimos anos, 20 foron os equipos participantes, divididos en 5 grupos de 4, para afrontar a primeira fase da competición, que é a fase de grupos. Tralas 6 xornadas correspondentes a esta primeira fase, viñeron os cuartos de final e as semifinais, a partido único, e a final. A primeira xornada foi o día 8 de outubro do 2010, e a gran final foi o 20 de maio do 2011, disputouse no Cardiff City Stadium de Cardiff (Gales) un día antes da gran final da Heineken Cup, que se xogou na mesma cidade, mais noutro estadio, o Millennium Stadium.
O equipo que defendía este ano o título obtido na anterior tempada era Cardiff Blues, que o ano anterior acadara por 1ª vez o título de campión, vencendo na final a RC Toulon.
Este ano Francia achegou 7 equipos ó torneo, Inglaterra 6, Italia 4, Irlanda 1, Romanía 1 e España 1.
Ó remate da fase de grupos, os 5 equipos líderes de grupo pasaron directamente á fase de cuartos de final, así coma os 3 mellores equipos da Heineken Cup que non foron capaces de pasar ós cuartos de final.
Sumados aos 5 equipos que conseguiron ser primeiros nos grupos, presentáronse nos cuartos de final os 3 equipos mellores da primeira fase da Heineken Cup 2010-2011 que non foron capaces de clasificarse para os cuartos de final da máxima competición continental. Nesta tempada eses 3 equipos foron Munster Rugby, London Wasps e ASM Clermont, algúns dos mellores equipos do continente.
