Daniel Oren

Na Galipedia, a Wikipedia en galego.
Daniel Oren.

Daniel Oren, nado en Jaffa en 1955 é un director de orquestra israelí. Dende 2007 é director artístico do Teatro Verdi de Salerno (Italia).

Traxectoria[editar | editar a fonte]

Daniel Oren naceu en Israel, comezando os seus estudos de canto, harmonía, contrapunto e piano moi novo. Cando tiña 13 anos foi escollido por Leonard Bernstein para interpretar a parte solista de neno nos Chichester Psalms.[1] Posteriormente perfeccionou os seus estudos de dirección en Alemaña, gañando en 1975 o primeiro premio na primeira edición da Herbert von Karajan Conducting Competition.[2]

Oren dirixiu producións operísticas en toda Europa e os Estados Unidos. Oren dirixiu na Royal Opera House Covent Garden, o Metropolitan de New York, o Arena de Verona, a Staatsoper de Viena, a Opéra Bastille de París e os teatros de ópera de Roma, Trieste, Xénova, Florencia, Parma, Turín, Venecia, Bos Aires, San Francisco, Toquio, Houston, Washington, entre outros.[3] Tamén dirixiu moitos concertos de música sinfónica con orquestras como a da Accademia Nazionale de Santa Cecilia en Roma, a Maggio Musicale Fiorentino de Florencia, e outras orquestras de Colonia, Stuttgart, Frankfurt e a Berliner Philharmoniker.

Dende hai vinte anos é un dos protagonistas do Arena di Verona Festival.[4]

Repertorio[editar | editar a fonte]

O seu repertorio operístico inclúe moitas óperas de Verdi, entre elas Aida, Simon Boccanegra, La traviata, Rigoletto e Nabucco; óperas de Puccini como Madama Butterfly, Tosca e Turandot; así como as óperas Andrea Chenier (Giordano), Norma (Bellini), La Juive (Halevy) e Carmen (Bizet).

Coa Ópera de Israel dirixiu as óperas Nabucco (Verdi), La Bohème, Tosca (Puccini) e La Juive (Halevy).

Notas[editar | editar a fonte]