Castro de Lobadiz

Castro de Lobadiz
Tipo	castro
Conservación	abandono
Localización
43°30′29″N 8°19′49″O
Estado	España
Comunidade autónoma	Galicia
Provincia	provincia da Coruña
Concello	Ferrol
Parroquia	San Xurxo da Mariña
Datas
Escavación	escavado parcialmente anos 1970
Dimensións
Superficie	0,8
Patrimonio cultural
Id. catálogo	GA15036001
[ Wikidata ]

O castro de Lobadiz é un castro costeiro fortificado, situado nunha península na parroquia de San Xurxo da Mariña, Ferrol.

Descrición

Esquema do castro de Lobadiz.

Illas Gabeiras vistas dende o castro.

O castro ten defensas concéntricas, cun foxo no medio; formando polo leste, sobre o istmo, un arco duns 150 metros, onde está situada a entrada actual. Da terceira liña defensiva exterior só se conservan uns metros. O resto do perímetro da península está defendido por cantís. A península mide 180 metros de N-S e outros 160 metros de L-O. No castro había un torreón xa desaparecido, pódense ver restos dalgunha vivenda rectangular e con ángulos redondeados. En varias escavacións, nos anos 70, atopáronse restos de cerámica, lousas e muíños de man.

Moi preto do castro hai unha fonte e unha praia protexida. Nas illas Gabeiras, situadas fronte ao castro, téñense atopado restos de cerámica. O actual castro está abandonado, sobre el construíuse un faro e acceso para vehículos, tamén houbo un posto de vixilancia do exército agora en ruínas.

No mapa da Coruña de Francisco Coello, de 1865, a península na que está o castro recibe o nome de Punta Gabeiras ou de Levadizo.

Mitos e lendas

No libro Laia, a nena da Illa, de Ánxela Loureiro, fálase deste castro e dos seus poboadores. A protagonista da obra, unha rapaza chamada Laia, vive diversas aventuras en relación co castro, os seus habitantes e mesmo as tropas romanas. Conta unha lenda, tamén relatada no libro, que nas proximidades do castro (e non no seu interior, como é habitual) foron atopadas, por un labrego de Valón, alfaias clasificadas por especialistas como xoias castrexas.

Véxase tamén

Outros artigos

• Castros de Galicia
• Cultura castrexa
• Arco Ártabro

Ligazóns externas

• Castro de Lobadiz (en castelán).
• 02 ARQUEOLOXÍA NA TERRA DE TRASANCOS.flv video 13min18seg. (Castro de Lobadiz do 3min45seg ao 7min40seg.)