Alborada (Buenos Aires)

Na Galipedia, a Wikipedia en galego.
Saltar para a navegação Saltar para a pesquisa

Alborada é unha revista publicada en Buenos Aires dende 1925.

Historia e características[editar | editar a fonte]

Subtitulada Órgano de la Sociedad Agraria y Cultural Hijos del Partido de Corcubión, apareceu o 25 de agosto de 1925. Cambiou o seu subtítulo por Órgano de la Asociación Benéfica Cultural del Partido de Corcubión, despois por Revista Cultural e informativa de la Asociación Benéfica Cultural del Partido de Corcubión (números 66-74), Órgano y propiedad de la Asociación Benéfica Cultural del Partido de Corcubión (números 118-161), Publicación de la Asociación Benéfica, Cultural del Partido de Corcubión (número 172) e Revista de la Asociación Benéfica Cultural del Partido de Corcubión a partir do número 185. Foron os seus directores Antonio Díaz Novo, M. González, Gervasio Paz Lestón e Manuel Conde González. Tivo unha periodicidade variable, foi semanal, trimestral, semestral e anual. Os seus contidos centrábanse especialmente en novas relacionadas coa Asociación dos emigrantes de Corcubión e sobre a comarca de Fisterra, incluíndo tamén creación literaria ou notas sociais. Entre os seus colaboradores figuraron Antón Zapata García, José Campos Núñez, Florencio Delgado Gurriarán, Luís Amado Carballo, Salvador Mosteiro Pena e Jesús Bal y Gay.

Na década dos corenta a nómina de colaboradores agrandouse coa afluencia de exiliados galegos e con textos enviados desde Galicia. Agora escriben: Eduardo Blanco Amor, Luís Manteiga, Antón Alonso Ríos, Ánxel Sevillano, Manuel García Barros, Ramón Rey Baltar, Florencio Delgado Gurriarán, Xosé Conde Fernández, Avelino Díaz, Ricardo Carballo Calero, Xosé Neira Vilas ou Rodolfo Prada, entre outros.[1]

Notas[editar | editar a fonte]

  1. Vilavedra, D., ed. (1997). Diccionario da Literatura Galega. II. Publicacións Periódicas. Galaxia. pp. 30–32. ISBN 84-8288-137-X. 

Véxase tamén[editar | editar a fonte]

Bibliografía[editar | editar a fonte]