Volkswagen

Na Galipedia, a Wikipedia en galego.
Volkswagen
Volkswagen logo.svg
Tipo Pública
Fundación 28 de maio de 1937
Matriz Grupo Volkswagen
Localización Wolfsburg, Alemaña Alemaña
Fundador Asociación Automobilística Alemá
Persoas clave Martin Winterkorn
Ferdinand Piëch
Industria Automóbil
Produtos Automóbil
Número de empregados 368500 (2009)
Páxina web Volkswagen.com
Conxunto de bandeiras co logo de Volkswagen.

A Volkswagen é un fabricante de automóbiles en Baixa Saxonia, é o maior de Europa. Ten a súa sede central na cidade de Wolfsburg (Alemaña). A palabra 'Volkswagen' significa en alemán «automóbil do pobo». É a marca orixinal do que hoxe en día é o Grupo Volkswagen, que inclúe tamén ás marcas Audi, Bentley, Bugatti, Lamborghini, Porsche, SEAT, Škoda e Scania.

Fundación[editar | editar a fonte]

Volkswagen Beetle.

A orixe da empresa foi na década de 1930 na Alemaña nazi, e foi creada para proxectar e construír un vehículo que sería coñecido en Galiza coma "escaravello" (en alemán, Käfer) e que debía, segundo o desexo de Adolf Hitler, ser barato, para que calquera traballador puidese compralo. O enxeñeiro encargado do proxecto foi Ferdinand Porsche (1875-1952), a pesar de que gran parte do seu deseño se inspirou nos automóbiles da Tatra, creados por Hans Ledwinka.

Unhas 336 000 persoas pagaron polo modelo e prototipos do coche, chamados en alemán Kdf-Wagen (KDF significava Kraft durch Freude = forza con ledicia) que apareceran no 1936. O coche xa posuía as curvas características do seu formato e o motor arrefriado con aire de 4 cilindros montado na traseira.

A nova fábrica, implantada nunha cidade desenvolvida para albergala e que foi bautizada coma KDF-Stadt, tan só puidera fabricar unhas poucas unidades cando comezou a Segunda Guerra Mundial no 1939. Como consecuencia da guerra, a súa produción foi adaptada para vehículos militares, coma o jeep Kübelwagen e o modelo anfibio Schwimmwagen.

1945: un futuro incerto[editar | editar a fonte]

A empresa debe a súa existencia na posguerra ao maior británico Ivan Hirst. En abril de 1945 a KdF-Stadt e súa fábrica, fortemente bombardeada, foron capturadas polos estadounidenses e pasaron á administración británica. A primeira idea foi usala para facer manutención de vehículos militares pesados e como parte da reparación de guerra. Hirst pintou de verde un dos coches da fábrica e o presentou en instalacións militares británicas. Dispondo de poucos vehículos leves de transporte, o exército británico foi persuadido para que comprase 20 mil unidades en setembro de 1945. As primeiras unidades foron para as forzas de ocupación e para o correo alemán.

En 1946 a fábrica xa producía 1000 coches por mes, unha cantidade notábel, pois a fábrica aínda non fora concertada: a choiva interrompía a produción por falta de vidros nas fiestras e por furados nas tellas. O aceiro para facer automóbiles pagábase coa produción de vehículos.

O coche e a cidade mudaron os nomes dados por Hitler por Volkswagen e Wolfsburg, respectivamente. Mentres tanto, crecía a produción. A fábrica foi ofrecida a industriais británicos, estadounidenses e franceses, pero ningún se interesou.

1948 a 1974: a recuperación alemá[editar | editar a fonte]

Despois do 1948, a Volkswagen tornouse un importante elemento simbólico e económico da recuperación da Alemaña Occidental. Heinrich Nordhoff (1899-1968), ex-xerente da montadora Opel, converteuse no dirixente da Volkswagen naquel ano. En 1949, o inglés Hirst deixou a empresa, agora reorganizada como un monopolio controlado polo goberno alemán occidental. Neste ano, foron creados o vehículo comercial "VW tipo 2" (coñecido como Kombi, en versións para pasaxeiros, camioneta e van) e o deportivo Karmann Ghia. Nordhoff seguiu a política de modelo único ata pouco antes de súa morte, en 1968.

A produción do "WW tipo 1" (en alemán, Käfer; nos Estados Unidos e noutros países de lingua inglesa, Bug ou Beetle; en Portugal, Carocha; en Galiza, "Escaravello"), creceu moito co pasar dos anos, alcanzando un millón de vehículos o ano 1954. Durante a década de 1960, a súa reputación de vehículo fiábel (non se avariaba facilmente) e a súa publicidade axudaron á expansión do modelo polo mundo, superando, no ano 1973, a produción histórica do Modelo T da Ford, con 16 millóns de unidades.

A Volkswagen expandiu a súa liña de produtos o 1967 coa introdución de modelos chamados "tipo 3" e despois os "tipo 4", que non chegaron a triunfar, a pesar dos avances tecnolóxicos, como transmisión automática, inxección de combustíbel e carrocería monobloque.

Do Escarabello ao GOLF[editar | editar a fonte]

Volkswagen New Beetle Cabriolet

A finais dos anos 60, a Volkswagen afrontou problemas debido ao fracaso dos "tipo 3" e "tipo 4", e tamén do K70, baseado no modelo da montadora NSU. A empresa sabía que a produción do "Käfer" iría terminar nalgún momento, pero o enigma sobre como substituílo transformárase nun pesadelo. A chave para o problema foi a compra, en 1964, da Audi/Auto-Union, a cal posuía os coñecementos sobre tracción dianteira e motores arrefriados con auga que a Volks precisaba para producir un sucesor do "tipo 1". A influencia de Audi abriu camiño para unha nova xeración de Volkswagens: Polo, Golf e Passat.

A produción do Käfer en Wolfsburg rematou no 1974, sendo substituído polo Golf. Este era un vehículo totalmente diferente, tanto na mecánica coma no deseño, do seu antecesor. As súas liñas rectas foran deseñadas polo proxectista italiano Giorgetto Giugiaro. O "Käfer" continuou a ser fabricado en México e no Brasil ata 1986 (despois novamente entre 1993 e 1996), e en fábricas alemás máis pequenas ata 1978. Ata a fin de súa produción en México en 2003, o Escaravello (Käfer) chegou a ter 21.529.464 unidades producidas en todo o mundo.

Modelos actuais[editar | editar a fonte]

Modelos que xa non se fabrican[editar | editar a fonte]

Véxase tamén[editar | editar a fonte]

Commons
Commons ten máis contidos multimedia na categoría: Volkswagen Modificar a ligazón no Wikidata

Ligazóns externas[editar | editar a fonte]