Limita con Hungría e Serbia ao oeste, Ucraína e Moldavia ao nordeste e ao leste, e Bulgaria ao sur. Con 238 391 km², Romanía é o noveno país máis grande da Unión Europea por área, e conta coa sétima maior poboación da Unión Europea con máis de 19 millóns de habitantes. A súa capital e cidade máis poboada é Bucarest, a décima cidade máis grande da Unión Europea.
A Revolución Romanesa de 1989 foi unha serie de conflitos e enfrontamentos nos derradeiros días de decembro de 1989. A conclusión deste episodio da historia de Romanía foi o final do réxime stalinista de Nicolae Ceauşescu. Os actos violentos que aconteceron en varias localidades romanesas naqueles días conduciron ao ditador ao abandono do poder e a súa fuxida de Bucarest, en compañía da súa dona, Elena Ceauşescu. Prendidos en Târgovişche, foron axuizados por un tribunal militar creado ex-profeso baixo os cargos de xenocidio, danos á economía nacional e abuso do poder para executar accións militares contra o pobo romanés. Achados culpables de tódolos cargos, foron executados o 25 de decembro de 1989. Romanía foi o único país do Bloque do Leste onde a transición dende o Estado socialista a un de mercado implicou a execución dos líderes do país.
O número total de mortes na Revolución Romanesa foi de 1.104, dos que 162 falecementos aconteceron nas protestas que puxeron punto final ao réxime de Nicolae Ceauşescu (protestas ocorridas do 16 ao 22 de decembro de 1989) e as restantes 942 nos disturbios ocorridos antes da toma do poder por parte dunha nova estrutura política, chamada Fronte de Salvación Nacional (FSN). A maioría das mortes ocorreron en cidades como Timişoara, Bucarest, Sibiu e Arade, onde as protestas acadaron magnitudes maiores. O número de feridos chegou a 3.352, dos que 1.107 corresponden ao período no que Ceauşescu aínda detentaba o poder, e os restantes 2.245 corresponden ao período posterior á toma do poder por parte da Fronte de Salvación Nacional.
Constancia é unha das cidades máis antigas de Romanía. A cidade foi conquistada polos romanos no 71 a. C. e rebautizada como Flavia Iulia Constantia en honor á irmá do emperador Constantino o Grande. Durante o século XIII, o Gran Mar (como se chamaba entón ao mar Negro) estaba dominado por comerciantes italianos de Xénova, que axudou ao desenvolvemento da cidade. Posteriormente sufriu un declive baixo o dominio otomán, converténdose nunha simple vila habitada por pescadores gregos e criadores de cabalos e ovellas tártaros. Constancia volveu ser unha cidade logo da construción do ferrocarril Cernavoda-Constancia e o porto, en 1865. Logo da Guerra da Independencia ( 1877 - 1878 ), cando Dobrogea pasou a formar parte de Romanía, Constancia, o principal porto do estado, creceu continuamente, ocupando este papel ata hoje.
Vlad III O Empalador (en romanés : Vlad Țepeș), nado en Sighişoara o 8 de novembro de 1431 e finado en Bucarest o 14 de decembro de 1476, foi un Príncipe de Valaquia (hoxe sur de Romanía) e a figura histórica na que o escritor irlandésBram Stoker se inspirou para crear ao inmortal personaxe do Conde Drácula. Foi un gran loitador en contra do expansionismo otomán que ameazaba o seu país e o resto de Europa, e tamén era famoso pola súa maneira de castigar aos inimigos e traidores. Vlad era ortodoxo, aínda que con posterioridade se converteu ao catolicismo.
_by_Pudelek.jpg)
.svg){kind=small}
