Operación Crossroads
A operación Crossroads consistiu nun par de probas de armas nucleares realizadas polos Estados Unidos no atol Bikini a mediados de 1946. Foron as primeiras probas nucleares trala proba Trinity de xullo de 1945, e as primeiras detonacións de dispositivos nucleares tralos bombardeos de Hiroshima e Nagasaki do 6 e 9 de agosto de 1945. O propósito destas probas era investigar que efectos tiñan armas nucleares nos navíos de guerra.
Estas probas foron as primeiras dunha serie de probas realizadas nas illas Marshall, e a primeira en anunciarse publicamente con anterioridade e observadas por un público invitado, incluíndo un gran número de xornalistas. As probas foron lideradas polo vicealmirante William H. P. Blandy e non polo persoal do propio Proxecto Manhattan. Dispúxose unha frota de 95 navíos obxectivo na lagoa do atol Bikini, detonando dúas bombas Fat Man de plutonio semellantes á lanzada sobre Nagasaki.
A primeira proba recibiu a denominación Able. A bomba nomeouse Gilda pola personaxe de Rita Hayworth no filme de 1946 Gilda, e foi lanzada dende o B-29 Superfortress Dave's Dream do Grupo de Bombardeiros 509 o 1 de xullo de 1946. Detonouse a 158 m sobre a frota obxectivo e causou menos danos dos agardados xa que non acadou o obxectivo por uns 649 m. A segunda proba chamouse Baker. A bomba desta segunda proba chamouse Helen of Bikini e detonouse a 27 m baixo a auga o 25 de xullo de 1946. A auga mariña radioactiva que desprazou provocou unha significativa contaminación. Os plans incluían unha terceira proba a gran profundidade denominada Charlie para 1947, pero foi cancelada principalmente pola incapacidade da Armada de descontaminar os navíos obxectivo trala proba Baker. Charlie pasou a denominarse operación Wigwam e realizouse en 1955 na costa de California.
Os nativos do atol Bikini acordaron evacuar a illa e a maioría deles trasladouse ó atol Rongerik. Nos anos 1950 unha serie de probas termonucleares deixaron o atol Bikini inservible para a agricultura de subsistencia e a pesca por mor da contaminación radioactiva, e a data de 2015 o atol permanecía deshabitado. O químico Glenn T. Seaborg cualificou a proba Baker como "o primeiro desastre nuclear do mundo".[1]
Notas[editar | editar a fonte]
- ↑ Weisgall 1994, p. ix.
Véxase tamén[editar | editar a fonte]
 |
Wikimedia Commons ten máis contidos multimedia na categoría: Operación Crossroads  |
Bibliografía[editar | editar a fonte]
- Bulletin Editors (1946). "Operation Crossroads: The Effect of the Atomic Bomb on Naval Power". Bulletin of the Atomic Scientists (Chicago) (Vol. 1, No. 5, 15 de febreiro de 1946): 1.
- Daly, Thomas N. (1986). "Crossroads at Bikini". Proceedings of the U.S. Naval Institute (Annapolis, Maryland) (Vol. 112, No. 7, 1986): 65–74. ISSN 0041-798X.
- Delgado, James P. (1996). Ghost Fleet: The Sunken Ships of Bikini Atoll. Honolulu: University of Hawaii Press. ISBN 978-0-8248-1864-7.
- Groves, Leslie (1962). Now It Can Be Told: The Story of the Manhattan Project. Nova York: Harper. ISBN 0-306-70738-1. OCLC 537684.
- Hansen, Chuck (1995). Volume VII: The Development of US Nuclear Weapons. Swords of Armageddon: US Nuclear Weapons Development since 1945. Sunnyvale, California: Chukelea Publications. ISBN 978-0-9791915-1-0. OCLC 231585284.
- Institute of Medicine, National Academy of Sciences (1996). Thaul, William; Page, William F.; Crawford, Harriet, eds. The Five Series Study: Mortality of Veteran Participants in the CROSSROADS Nuclear Test: Study pursuant to 1983 Public Law 98–160. Washington, DC: National Academy Press. ISBN 978-0-585-14895-3. OCLC 43477109.
- Life Editors (1947). "What Science Learned at Bikini". Life (Nova York) (Vol. 23, No. 16, 11 de agosto de 1947): 74–85. ISSN 0024-3019.
- Shurcliff, William A. (1946). Operation Crossroads: The Official Pictorial Record. Nova York: William H. Wise and Co. OCLC 1223420.
- Shurcliff, William A. (1947). Bombs at Bikini: The Official Report of Operation Crossroads. Nova York: William H. Wise and Co. OCLC 1492066.
- Waters, Odale D., Jr. (1986). "Crossroads: A Tin Can Perspective". Proceedings of the U.S. Naval Institute (Annapolis, Maryland) (Vol. 112, No. 7, 1986): 72–74. ISSN 0041-798X.
- Weisgall, Jonathan (1994). Operation Crossroads: The Atomic Tests at Bikini Atoll. Annapolis, Maryland: Naval Institute Press. ISBN 978-1-55750-919-2.
Ligazóns externas[editar | editar a fonte]
|
Este artigo sobre historia é, polo de agora, só un bosquexo. Traballa nel para axudar a contribuír a que a Galipedia mellore e medre.
Existen igualmente outros artigos relacionados con este tema nos que tamén podes contribuír. |