Estevo Creus

Estevo Creus recitando nun supermercado

Estevo Creus Andrade, nado en Cee en 1975, é un escritor galego que ten destacado especialmente no eido da poesía.

Traxectoria

Os seus inicios literarios veñen marcados pola súa participación no Batallón Literario da Costa da Morte, e a través das súas obras colectivas Nós (1997) e Mar por medio (1998). Tamén naqueles anos publicou como narrador os relatos E a catro patas: quilómetros... (1994) e Confeso que matei a bambi (1996).

A súa primeira obras individual é do 1996, cando sae á luz Poemas da cidade oculta. Ese mesmo ano gaña con Areados o premio Miguel González Garcés da Deputación da Coruña. No ano 1998 gaña o premio Eusebio Lorenzo Baleirón co poemario Teoría do lugar, e no 2002 o III Premio de poesía Fiz Vergara Vilariño con Decrúa.

Interesado en experimentar coas novas formas da edición, convírtese nun dos membros fundadores da editora Letras de Cal e participa tamén no proxecto Retagarda Edicións dedicado a editar libros en formato dixital empregando o diskette como soporte. Publica nese formato O libro dos cans no ano 2000. Tamén no ano 2007 e xunto co seu irmán, o escritor e artista gráfico David Creus, publica facer Merzbau non ou posible?, un libro que pretende borrar as fronteiras do concepto tradicional de autoría e que se move dentro dun concepto multimediático da literatura (acompáñase dun DVD e de autocolantes).

Estevo Creus é licenciado en Psicoloxía e foi tamén fundador do Grupo de Teatro Talía.

Obra publicada

Poesía

• Poemas da cidade oculta (Xerais, 1996).
• Areados (Deputación da Coruña, 1997).
• Teoría do lugar (Ediciós do Castro, 2000).
• Libro dos cans (Retagarda Edicións, 2000. 2ª edición en Franouren, 2010).
• Decrúa (Espiral Maior, 2003).
• Balea2 (Positivas, 2011).
• Tirotea2 (2011).

Obras colectivas

• Rumbo ás illas. Escritores da Costa da Morte nas Sisargas (Asociación Cultural Monte Branco/Asociación Neria, O Couto, Ponteceso, 1997).
• dEfecto 2000 (Letras de Cal, 1999).
• facer Merzbau non ou posible? (xunto con David Creus, non ou edicións, 2007).
• De Pondal ao Batallón Literario. 120 anos de poesía na Costa da Morte (Sotelo Blanco, 2009).
• Erato bajo la piel del deseo (Sial Ediciones, 2010).

Premios

• Gañador do Premio Miguel González Garcés no 1996, por Areados.
• Gañador do Premio Eusebio Lorenzo Baleirón no 1998, por Teoría do lugar.
• Gañador do III Premio de poesía Fiz Vergara Vilariño no 2002, por Decrúa.

Véxase tamén

Ligazóns externas

• Ficha do autor na AELG