Drahomír Zobek
| Biografía | |
|---|---|
| Nacemento | 23 de outubro de 1956  (67 anos)Nová Baňa (pt)  |
| Datos persoais | |
| País de nacionalidade | Eslovaquia |
| Actividade | |
| Ocupación | escultor |
| Lingua | Lingua eslovaca |
Drahomír Zobek, nado en Nová Baňa, na rexión de Banská Bystrica, o 20 de xullo de 1952, é un escultor, medallista e deseñador de moeda eslovaco.[1]
Traxectoria[editar | editar a fonte]
Drahomír Zobek cursou entre 1967 e 1971 estudos profesionais artísticos na Escola de Artes Aplicadas SUPŠ, de Kremnica,[2] na especialidade de gravado gráfico, en placa metálica e en plástico.[3]
Logo do seu período formativo ingresou no cadro de gravadores da Casa da Moeda de Kremnica, e alí ocupou o cargo de gravador xefe entre 1992 e 1997. Neste último ano abandonou a ceca pública eslovaca para traballar como creador independente, con colaboracións puntuais con empresas privadas do sector da medallística.[2][3]
Nas súas creacións utiliza a modo de sinatura as súas iniciais DZ ou ben simplemente o Z do seu apelido.[3]
Drahomír Zobek é membro da Asociación de Medallistas de Eslovaquia, entidade que presidiu durante un longo período. Tamén é membro da Federación Internacional da Medalla de Arte, en cuxas exposicións internacionais participou asiduamente: Lisboa (1979), Florencia (1983), Estocolmo (1985), Helsinqui (1990), Budapest (1994), París (2002) Seixal (2004) e Kremnika (1995).[2]
Obra[editar | editar a fonte]
Esculturas[editar | editar a fonte]
Dentro da súa escasa produción como escultor, cabe salientar a escultura do cineasta Viktor Kubal e do seu personaxe Zbojník Jurko ("Jurko o bandido") na "calella dos narices famosos" de Kremnica, ambas de 2006.[3][4]
Medallas[editar | editar a fonte]
Aínda que a súa obra abrangue tamén condecoracións, insignias, fichas, imáns e outros obxectos de pequeno tamaño, o máis salientable das súas creacións está na medallística. Algunhas das súas medallas están dedicadas a personaxes como Xoán Paulo II (1990) e outras, máis comunmente, a conmemoracións como 50 aniversario da Organización Numismática de Bratislava (1984) ou os 150 anos do ferrocarril en Eslovaquia (1998).[3]
Moedas[editar | editar a fonte]
Drahomír Zobek iniciouse na creación de moedas como autor de tres moedas conmemorativas da coroa checoslovaca, entre 1986 e 1991, e a partir de 1993 creou a primeira serie circulante da coroa eslovaca para a Eslovaquia independente.[5]
Coa integración do seu país na Eurozona, encomendóuselle tamén o deseño do anverso nacional das moedas circulantes divisionarias de 1, de 2 e de 5 céntimos de euro cuñadas na Casa da Moeda de Kremnica, para as que escolleu unha representación da montaña Kriváň, dos Altos Tatras, cargada de simbolismo para Eslovaquia.[5]
Notas[editar | editar a fonte]
- ↑ "Drahomír Zobek". ABART.
- ↑ 2,0 2,1 2,2 "Drahomír Zobek". Mezinárodní Medailérské Sympozium v Uherském Hradišti. 2010
- ↑ 3,0 3,1 3,2 3,3 3,4 "Drahomír Zobek". Mince na území Slovenska.
- ↑ "Viktor Kubal. The alley of famous noses". Kremnické Gagy (gagy.eu)
- ↑ 5,0 5,1 Moedas deseñadas por Drahomír Zobek. Numista.com