Acre, Israel

Na Galipedia, a Wikipedia en galego.
Cidade Vella dende o porto

Acre (עכו "Akko" en hebreo e عكّا "Akkā" en árabe) é unha cidade de Israel, situada no Distrito do Norte, na beira do Mar Mediterráneo. En 2003 tiña 45.600 habitantes, 75 % de xudeus e 25% árabes. Acre é a sede do xefe da Fe Bahai.

Historia[editar | editar a fonte]

Acra identifícase coa Aak, cidade tributaria de Tutmose III e coa Akka dos rexistros de Amarna. No Antigo Testamento aparece unha vez co nome de Acco.

No ano 700 a.C. a cidade caeu en poder dos asirios. No 332 a.C. conquistouna Alexandre Magno, e no século III a.C. Ptolomeo II.

En 638 os árabes fixéronse co control da cidade ata que os cruzados a conquistaron no 26 de maio de 1104, dándolle o nome de San Xoán de Acre. Reconquistada por Saladino no 1187, cercada sen éxito por Guy de Lusignan no 1189, e de novo conquistada por Ricardo Corazón de León no 1191. Convertida en capital do que quedaba do Reino de Xerusalén. En 1229 foi posta baixo o control dos Cabaleiros Hospitalarios. No ano 1291 os mamelucos conquistan a cidade.

En 1517 captúraa Selim I para o Imperio Otomán, e a cidade entrou nun período de decadencia. A fins do século XVIII comeza a se recuperar baixo o goberno de Daher El-Omar, o sheikh local, o seu sucesor Jezzar Pasha, gobernador de Damasco, fortificouna. Napoleón cercou a cidade no ano 1799 durante dous ata que foi expulsado polos turcos, axudados por unha forza naval británica.

Dende 1918 os británicos gobernaron a cidade ata que en 1948 se integrou en Israel.