Xosé Casares Gil

Xosé Casares Gil
Datos persoais
Nacemento	10 de marzo de 1866
Lugar	Santiago de Compostela
Falecemento	21 de marzo de 1961
Lugar	Santiago de Compostela
Nacionalidade	España
Actividade
Campo	farmacéutico, químico e político
Alma máter	Universidade de Santiago de Compostela e Universidade de Salamanca
Premios	Gran Cruz de la Orden Civil de Sanidad e Gran Cruz da Orde Civil de Alfonso XII
[ editar datos en Wikidata ]

Xosé Casares Gil, nado en Santiago de Compostela o 10 de marzo de 1866 e finado o 21 de marzo de 1961, foi un farmacéutico galego. Foi o precursor do desenvolvemento actual da Química en España.

Traxectoria

Pertencente a unha familia de profesores universitarios, licenciouse en farmacia en 1884 pola USC. En 1888 logrou a primeira cátedra de Análise Química e Técnica Física da Facultade de Farmacia de Barcelona, da que pasou á de Madrid en 1905. Estudou tamén ciencias, e organizou as ensinanzas básicas da carreira.

En 1896 foi a Múnic en viaxe de estudos, traballando baixo a dirección do profesor Adolph Baeyer. Alí puido coñecer as técnicas da investigación química, que tanto esplendor tiñan naquel entón en Alemaña. Foi condiscípulo entre outros de Richard Martin Willstätter, Heinrich Otto Wieland, cos que mantivo amizade e vencello toda a súa vida.

Estivo en París completando a súa formación con Henri Moissan, o descubridor do flúor e autor de técnicas de investigación en baixas e altas temperaturas. En 1899 viaxou a Nova York, onde traballou con Alexander Smidt na separación de metais nobres e terras raras.

De regreso á Universidade de Barcelona, pronunciou un célebre discurso de apertura do curso 1900-01, expoñendo o atraso das universidades do estado español, nas que, malia haber excelentes conferenciantes, non se producían achegas orixinais a unha ciencia que camiñaba a pasos axigantados.

Foi elixido académico da Real Academia de Ciencias Exactas, Físicas e Naturais o 6 de decembro de 1911, ingresando o 15 de xuño de 1913 cun discurso sobre a valencia química. Foi designado presidente o 24 de xaneiro de 1940, renunciando o 11 de xuño de 1958. En función deste posto, foi procurador en Cortes.

Na actualidade existe a Fundación José Casares Gil de amigos de la Real Academia Nacional de Farmacia.

Véxase tamén

Bibliografía

• Casares López, Román (1987). Recuerdos de una vida: José Casares Gil, Madrid (Monografías Beecham n.° 34).
• Díaz-Fierros, F.; Fraga, X. A.; Mato, A., eds. (2018). Álbum da ciencia: 30 nomes e as súas achegas. Santiago de Compostela: CCG. ISBN 978-84-92923-94-6. 
• Dicionario biográfico de Galicia. Ir Indo Edicións. 2010-2011. 

Ligazóns externas

• Real Academia de Ciencias Exactas, Físicas e Naturais Arquivado 24 de decembro de 2017 en Wayback Machine. (en castelán).
• Traxectoria na páxina de Biografias y Vida (en castelán).

• Xosé Casares Gil no Álbum da Ciencia do Consello da Cultura Galega.

• Xosé Casares Gil no Álbum da JAE do Consello da Cultura Galega.