Morelos, formalmente Estado Libre e Soberano de Morelos, é un dos 31 estados, que xunto coa Cidade de México, conforman as entidades federais de México. Divídese en 36 concellos[1][2] e a súa capital é Cuernavaca. Morelos está rodeado pola Cidade de México polo norte, e cos estados de México polo nordeste e noroeste, Puebla polo leste e Guerrero polo suroeste.
Morelos é o segundo estado máis pequeno do país, só por detrás de Tlaxcala. Formaba parte dunha provincia moi grande, o Estado de México, até que en 1869 Benito Juárez decretou que o seu territorio sería separado e nomeado na honra de José María Morelos y Pavón, quen defendeu a cidade de Cuautla das forzas realistas durante a guerra mexicana de independencia. A maior parte do estado goza dun clima cálido durante todo o ano, o que é bo para a cría de cana de azucre e outros cultivos. Morelos atraeu visitantes do val de México dende os tempos dos aztecas.
