Eurocontrol ou Organización Europea para a Seguridade da Navegación Aérea (en inglés: European Organisation for the Safety of Air Navigation) é unha organización internacionaleuropea fundada en 1963 en Bruxelas, que foi promovida por Alemaña, Bélxica, Francia, Luxemburgo, os Países Baixos e o Reino Unido. É unha organización internacional que traballa para conseguir unha xestión segura e fluída do tráfico aéreo en toda Europa. Actualmente Eurocontrol ten 41 estados membros e ten a súa sede en Bruxelas, Bélxica. Tamén ten varios sitios locais, incluíndo un centro de innovación en Brétigny-sur-Orge, Francia, o Air Learning Center (ALC) en Luxemburgo e o Maastricht Upper Area Control Center (MUAC) en Maastricht, Países Baixos. A organización dá traballo a unhas dúas mil persoas e funciona cun orzamento anual de máis de medio millón de euros.[1]
Trátase dunha organización civil e militar formada por 39 estados membros que ten como obxectivo o desenvolvemento dun sistema de tráfico aéreo europeo seguro, eficiente e coordinado: "Un ceo único europeo". Aínda que Eurocontrol non é unha axencia da Unión Europea, a UE delegou a Eurocontrol parte da súa normativa do Ceo Único Europeo, polo que é a organización central para a coordinación e planificación do control do tráfico aéreo para toda Europa.[2] A propia UE é asinante de Eurocontrol e actualmente todos os estados membros da UE tamén son membros de Eurocontrol. A organización traballa con autoridades dos Estados membro, provedores de servizos de navegación aérea, usuarios do espazo aéreo civil e militar, aeroportos e outras organizacións. As súas actividades inclúen todas as operacións de servizos de navegación aérea porta a porta: xestión estratéxica e táctica do fluxo, formación de controladores, control do espazo aéreo rexional, tecnoloxías e procedementos a proba de seguridade e cobro de taxas de navegación aérea.
