Cinchona

Cinchona

C. officinalis

Reino:	Plantae
División:	Magnoliophyta
Clase:	Magnoliopsida
Orde:	Gentianales
Familia:	Rubiaceae
Subfamilia:	Cinchonoideae
Tribo:	Cinchoneae
Xénero:	Cinchona L., 1753

Especies

Véxase o texto

Cinchona é un xénero de plantas fanerógamas da orde das Gentianales da familia das Rubiaceae. Ten 25 especies de grandes arbustos ou pequenas árbores que alcanzan os 5-15 metros de altura.^[1]

Ten as follas opostas, lanceoladas a redondeadas, perennes de 1-4 dm de lonxitude. As flores de cor branca, rosa ou vermella prodúcense en panículas terminais. O froito é unha cápsula con numerosas sementes.

Algunhas especies deste xénero, como a Cinchona officinalis, tamén chamada quina, producen quinina, un alcaloide con propiedades antipiréticas, antipalúdicas e analxésicas. O descubrimento das súas propiedades supuxo unha revolución no eido da medicina, e aínda hoxe se segue empregando con fins médicos.

Foi nomeada por Carl Linnaeus na honra de Dona Francisca Enríquez de Rivera, a segunda esposa do IV Conde de Chinchón, Don Luis Jerónimo Fernández de Cabrera y Bobadilla, por ser ela, segundo a tradición, quen descubriu o seu uso entre as xentes do Vello Mundo polas propiedades medicinais da casca desta planta. Linnaeus transcribiu o son castelán 'chi' á maneira italiana, isto é, 'ci', o cal era frecuente na época.