Orgullo e paixón

Orgullo e paixón
Ficha técnica
Título orixinal	The Pride and the Passion
Director	Stanley Kramer
Produtor	Stanley Kramer
Guión	Edna Anhalt Edward Anhalt
Baseado en	The Gun
Intérpretes	Cary Grant, Frank Sinatra, Sophia Loren
Música	George Antheil
Fotografía	Franz Planer
Estudio	Stanley Kramer Pictures
Distribuidora	United Artists
Estrea	10 de xullo de 1957
Duración	132 minutos
Orixe	Estados Unidos
Xénero	Bélico
Orzamento	3 700 000 $
Recadación	3 500 000 $
Lingua	Inglés
Na rede

Orgullo e paixón (en inglés: The Pride and the Passion) é un filme estadounidense de 1957, dirixido por Stanley Kramer. Encadrado no xénero bélico, está ambientado na España invadida pola Francia napoleónica e foi protagonizado por Cary Grant, Frank Sinatra e Sophia Loren.

A trama da película xira sobre un oficial de artillaría da Royal Navy británica que ten ordes de recuperar un enorme canón de asedio en España e transportalo en barco ás forzas británicas. Pero antes, o líder da guerrilla española quere transportar a arma a través de toda España para axudar na reconquista da cidade de Ávila de mans dos invasores franceses. A maior parte da película trata as dificultades de transportar o canón ata Ávila a través de ríos e montañas, ao mesmo tempo que o grupo tenta evadir as forzas francesas de ocupación que teñen a orde de atopalo. Unha das subtramas é a loita polo amor da española Juana (Sophia Loren) entre os dous protagonistas masculinos.

A historia e o guión cinematográfico de Edna Anhalt e Edward Anhalt están baseados libremente na novela de 1933 The Gun de CS Forester. Earl Felton contribuíu cunha reescritura do guión sen acreditar, George Antheil compuxo a partitura musical e Saul Bass deseñou a secuencia do título inicial.

É a única das moitas bandas sonoras de Antheil que se conserva nunha banda sonora comercial.

Argumento

Durante a Guerra da Independencia española, os exércitos de Napoleón invadiron España. Un enorme canón de cerco, pertencente ao exército español, queda abandonado para non frear a retirada do exército. Os cabaleiros franceses son enviados para atopalo. Gran Bretaña, aliado de España, envía a un oficial de artillaría da Royal Navy, o capitán Anthony Trumbull (Cary Grant), para atopar o enorme canón e que este sexa entregado ás forzas británicas antes de que os franceses poidan recuperalo. Porén, cando Trumbull chega ao cuartel español, descobre que foi evacuado e que agora está ocupado por unha banda guerrilleira dirixida por Miguel (Frank Sinatra). Miguel mostra a Trumbull a localización do canón abandonado no fondo dun barranco empinado. Di que só axudará a mover a enorme arma se se usa primeiro contra as murallas fortificadas de Ávila, que Miguel está obsesionado con liberar. Durante a súa asociación, os dous homes non se gustan. Unha das causas da súa inimizade é a amante de Miguel, Juana (Sophia Loren), que se namora de Trumbull.

Mentres, o sádico xeneral Jouvet (Theodore Bikel), o comandante francés en Ávila, ordena a execución dos reféns españois que non tiveran entregado información sobre o paradoiro do canón. O canón finalmente é recuperado e realiza un arduo percorrido en dirección a Ávila. A banda guerrilleira, cuxas filas aumentaron considerablemente, case perden o canón cando o xeneral Jouvet desprega fogo de artillaría nun paso de montaña que deben utilizar para chegar a Ávila. Coa axuda da poboación local, a banda logra pasar o canón, a pesar das grandes perdas, aínda que roda por unha longa costa e está danado, quedando parcialmente desmontado do seu carro de transporte. A continuación, o canón é movido e escondido dentro dunha catedral mentres se repara e máis tarde sácase oculto no medio dunha procesión de Semana Santa. Os oficiais franceses, mentres tanto, son informados da localización do canón na catedral, pero cando chegan xa foi reparado e trasladado sen deixar rastro.

Cando o canón finalmente chega ao campamento dos guerrilleiros nas aforas de Ávila, Trumbull e Miguel prepáranse para atacar a cidade. Con todo, Ávila está defendida por fortes murallas, oitenta canóns e unha guarnición de tropas francesas. Trumbull explica ás forzas guerrilleiras que a metade deles morrerán durante a batalla. Máis tarde, intenta convencer a Juana de que non participe na loita, pero, ao día seguinte, ela vai cos homes.

Trumbull dispara repetidamente o enorme canón de asedio e golpea e derruba lentamente unha sección da alta muralla de Ávila. A pesar de sufrir grandes perdas mentres avanzan, a guerrilla atravesa o muro da cidade e esmaga ás forzas francesas. O xeneral Jouvet morre e as últimas tropas francesas son atrapadas e mortas na praza da cidade. Despois da batalla, Trumbull despídese dunha Juana moribunda e coloca o cadáver de Miguel ao pé da estatua da patrona de Ávila, Santa Tareixa. Despois de conseguir o enorme canón abandona Ávila rumbo a Inglaterra, rememorando as súas aventuras por España.

Elenco

• Cary Grant como o capitán Anthony Trumbull.
• Frank Sinatra como Miguel.
• Sophia Loren como Juana
• Theodore Bikel como o xeneral Jouvet.
• John Wengraf como Sermaine.
• Jay Novello como Ballinger.
• José Nieto como Carlos.
• Philip Van Zandt como o coronel Vidal.

Produción

Os títulos de crédito de Saul Bass están baseados na serie impresa de Francisco de Goya Os desastres da guerra.

O filme rodouse en España no medio dos persistentes rumores de que Sinatra tomou parte nel só para estar preto da súa muller, Ava Gardner, coa que estaba a ter problemas matrimoniais. Gardner estaba lonxe de Sinatra polo seu papel en The Sun Also Rises (1957), que estaba sendo rodada en varios lugares de Europa, incluída España. Cando se deu conta de que non había reconciliación, Sinatra abandonou apresuradamente a produción, pedindo ao director Stanley Kramer que condensase as súas escenas nun calendario de rodaxe máis abreviado.

Entre as localizacións nas que se rodou o filme, atópanse Ávila, Santiago de Compostela, Arbo, Valdemoro, Pinto, Segovia, O Escorial, o porto do Pico, Oropesa e Torrelaguna.

O canón parece estar baseado no Canón Jaivana, en Jaipur, un dos canóns máis grandes xamais construídos, que aínda existe. A cor do uniforme naval do capitán Turnbull parece máis vinculada a lucir o Technicolor empregado no filme que a calquera representación histórica do azul marino británico, que é moito máis escuro. Esta elección de cor achega irónicamente a súa chaqueta moi preto da cor azul uniforme do inimigo francés.

Véxase tamén

Ligazóns externas

• Orgullo e paixón no catálogo do American Film Institute (en inglés).
• Orgullo e paixón en Variety (en inglés).