Discóbolo

Na Galipedia, a Wikipedia en galego.
Discóbolo, Londres, British Museum, coa cabeza restaurada de xeito incorrecto.

O Discóbolo[1] é unha escultura[2] realizada por Mirón de Eleuteras ao redor do 455C., que representa a un atleta xusto no intre de guindar un disco.

O Discóbolo de Mirón no Xardín Botánico de Copenhague, Dinamarca.

Hai quen interpreta que a figura representa ao heroe «Hyakinthos» (Xacinto); amado por Apolo, o cal matouno de xeito involuntario cun disco. Despois, co seu propio sangue crearía a flor do mesmo nome. Deste asunto existe un gran cadro, pintado por Giambattista Tiepolo, no Museo Thyssen-Bornemisza de Madrid.

Mirón representa o corpo no intre da súa máxima tensión; ese esforzo non se reflicte con todo no rostro, que amosa só unha feble concentración. A torsión do corpo, é vigorosa, pero ao mesmo tempo armoniosa e delicada. Todo o corpo está botado cara adiante, para producir co abaneo posterior o impulso necesario para poder lanzar o disco.

Como case todas as esculturas gregas, actualmente non subsiste o exemplar orixinal, seguramente realizado en bronce, e a obra coñécese por múltiples copias en mármore talladas en época romana. De entre estas copias que sobreviviron unha das máis famosas é a primeira en ser descuberta na época moderna, na Vila Palombara propiedade da familia Massimo, en 1781. Esta copia é coñecida como Lancelotti. Actualmente atópase no Museo Nazionale Romano de Roma.

Outra copia notable foi descuberta en 1790, e procede da Vila Adriana de Tívoli. Esta escultura é propiedade do Museo Británico dende 1805, onde se atopa á vista do público.

Notas[editar | editar a fonte]

  1. O que guinda discos.
  2. Esta escultura orixinal de bronce, só a coñecemos a través de copias romanas en mármore.

Véxase tamén[editar | editar a fonte]

Outros artigos[editar | editar a fonte]

Commons
Commons ten máis contidos multimedia na categoría: Discóbolo

Ligazóns externas[editar | editar a fonte]