William H. Brett
| Biografía | |
|---|---|
| Nacemento | 31 de decembro de 1893  Cleveland, Estados Unidos de América |
| Morte | 10 de abril de 1989 (95 anos) Palm Desert, California, Estados Unidos de América |
| Causa da morte | cancro de páncreas |
| Datos persoais | |
| País de nacionalidade | Estados Unidos de América |
| Educación | Dartmouth College. Tuck School of Business Administration. |
| Actividade | |
| Ocupación | Empresario e director da US Mint. |
| Lingua | Lingua inglesa |
| Familia | |
| Pai | William Howard Brett (pt)  |
Notes | |
William Howard Brett, nado en Cleveland, Ohio, o 31 de decembro de 1893 e finado en Palm Desert, California, o 10 de abril de 1989, foi un home de negocios estadounidense, director da Casa da Moeda dos Estados Unidos desde 1954 a 1961.
Traxectoria[editar | editar a fonte]
Primeiros anos e formación[editar | editar a fonte]
William H. Brett era fillo de Alice L. Allen e do bibliotecario público de Cleveland William Howard Brett.[1] A súa primeira educación recibiuna en escolas públicas de Ohio.[2]
Posteriormente cursou estudos superiores no Dartmouth College, unha institución universitaria privada de Hanover, Nova Hampshire,[3] e completounos cun último curso na Tuck School of Business Administration, na que se graduou en 1916.[2][4]
Durante a primeira guerra mundial serviu no exército estadounidense co rango de primeiro tenente, entre 1917 e 1918,[3] no campo de adestramento de Fort Myer, en Virxinia.[2]
Home de negocios[editar | editar a fonte]
Finalizada a contenda, Brett regresou a Ohio, onde transcorreu a súa traxectoria profesional, como enxeñeiro e como home de negocios, vinculado a varias empresas.[3] Foi un dos socios da compañía Perfection Spring; en 1919 ingresou como enxeñeiro industrial na compañía Scovell, Wellington & Co., ata que en 1921 foi nomeado vicepresidente e director de Enamel Products, e en 1943 ocupou os mesmos postos en Aliance Ware.[2][4]
Director da US Mint[editar | editar a fonte]
En 1954, o presidente Dwight D. Eisenhower nomeouno director da Casa da Moeda dos Estados Unidos (US Mint), cargo que ocupou entre xullo dese ano e xaneiro de 1961.[2][3][5] Durante a súa dirección levouse a cabo a reorganización da institución para reducir custos e mellorar a súa eficiencia operativa: modernizáronse os equipamentos e ampliáronse as instalacións da Ceca de Filadelfia, e cesou a actividade noutros centros, como a Ceca de San Francisco e a oficina de ensaios de Seattle.[2]
Logo do seu retiro como director da ceca pública exerceu como asesor financeiro e residiu en Washington.[3]
Vida familiar[editar | editar a fonte]
William H. Brett casou en 1917 con Catherine Ruth Connelly —finada en 1975—, con quen tivo un fillo e unha filla. En segundas nupcias casou con Mary Lynn Marburg.[3][4]
Brett finou por causa do cancro de páncreas que padecía na súa casa de Palm Desert, California, o 10 de abril de 1989, aos 95 anos.[3]
Notas[editar | editar a fonte]
- ↑ "Brett, William Howard". Encyclopedia of Cleveland History. Case Western Reserve University.
- ↑ 2,0 2,1 2,2 2,3 2,4 2,5 Failor, K. M.; Hayden, E. (1972). Páxinas 164-165.
- ↑ 3,0 3,1 3,2 3,3 3,4 3,5 3,6 "William H. Brett, 95, Former Mint Director". The New York Times. 13 de abril de 1989.
- ↑ 4,0 4,1 4,2 Smith, P. (2012). Páxina 52.
- ↑ "Former Directors of the United States Mint". United States Mint.
Véxase tamén[editar | editar a fonte]
Bibliografía[editar | editar a fonte]
- Failor, K. M.; Hayden, E. (1972). Medals of the United States Mint. US Government Printing Office.
- Smith, P. (2012). "Brett, William Howard". En American Numismatic Biographies.
Outros artigos[editar | editar a fonte]
| Predecesor: Nellie Tayloe Ross |
 Director da Casa da Moeda dos Estados Unidos 1954-1961 |
Sucesor: Eva Adams |
