Tamara Press

Tamara Press

Nome orixinal	(ru) Тамара Натановна Пресс
Biografía
Nacemento	10 de maio de 1937 Khárkiv, Ucraína
Morte	26 de abril de 2021 (83 anos) Moscova, Rusia
Datos persoais
País de nacionalidade	Rusia (1991–2021) Unión Soviética (1937–1991)
Altura	180 cm
Peso	102 kg
Actividade
Ocupación	atleta
Partido político	Partido Comunista da Unión Soviética
Lingua	Lingua rusa
Deporte	atletismo
Disciplina deportiva	Lanzamento de disco
Participou en
1964	Xogos Olímpicos de 1964
1960	Xogos Olímpicos de 1960
Familia
Irmáns	Irina Press
Premios  Orde de Lenin  Mestre emérito do deporte da Unión Soviética  Orde da Insignia de Honra  Orden da Amistade

Tamara Natanovna Press (en ruso: Тамара Натановна Пресс, en ucraíno: Тамара Натанівна Пресс, Tamara Natanivna Press), nada en Khárkiv o 10 de maio de 1937 e finada en Moscova o 26 de abril de 2021, foi unha atleta soviética que dominou o lanzamento de peso e o lanzamento de disco a principios da década de 1960. Gañou tres medallas de ouro e unha de prata nos Xogos Olímpicos de 1960 e 1964 e tres títulos europeos en 1958–1962. Entre 1959 e 1965, estableceu once récords mundiais: cinco no lanzamento do peso e seis no disco. A nivel nacional, logrou 16 títulos nacionais, nove no lanzamento de peso (1958-66) e sete no disco (1960-66).

Traxectoria

Tamara (esquerda) e Irina Press

Tamara Press naceu en Khárkiv, Ucraína, no seo dunha familia xudía. O seu pai morreu loitando na segunda guerra mundial en 1942, mentres a súa nai levou as fillas a Samarcanda, onde comezaron a adestrarse no atletismo. A súa irmá máis nova, Irina Press (1939–2004) tamén foi unha destacada atleta, sobre todo en péntatlon e sprint.

En 1955, Press mudouse a Leningrado para adestrar co renombrado adestrador Viktor Alekseyev e estudar na universidade, onde completou estudos de enxeñaría civil. O ano seguinte, foi seleccionada para o equipo olímpico, pero foi eliminada debido a unha forte competición nacional nos eventos de lanzamento.

Aínda que comezou nas probas de pista, especializouse en lanzamento de peso e disco. Aos 23 anos participou nos Xogos Olímpicos de Roma, onde gañou a medalla de ouro en peso establecendo un novo récord olímpico (17,32 metros), e a medalla de prata en lanzamento de disco. Nos Xogos Olímpicos de Toquio conseguiu a medalla de ouro en ambas as disciplinas con senllos récords olímpicos (18,14 m en peso e 57,27 m en disco).

As dúas irmás foron acusadas de seren varóns ou intersexuais. Retiráronse en 1966, antes de que a verificación do sexo fose obrigatoria.

Tras retirarse, Press traballou como adestradora e directiva de atletismo en Moscova. Escribiu varios libros sobre temas deportivos, sociais e económicos e en 1974 defendeu o seu doutoramento en pedagoxía. Foi galardoada coa Orde de Lenin (1960), coa Orde da Insignia de Honra (1964) e coa Orde da Amizade (1997).

Véxase tamén

Bibliografía

• Singler, Andreas; Treutlein, Gerhard (2009). Doping im Spitzensport: sportwissenschaftliche Analysen zur nationalen und internationalen Leistungsentwicklung (en alemán) (5.ª ed.). Meyer & Meyer Verlag. ISBN 978-3-89899-192-6. 
• Giardina, Nichael D.; Donnelly, Michelle. Youth Culture and Sport: Identity, Power, and Politics (en inglés). Rouutledge. ISBN 978-0-415-95581-2. Consultado o 19 de marzo de 2017. 

Ligazóns externas

• Tamara Press bate su propio récord mundial de lanzamiento de peso en 1964
• Galería de fotos de Tamara Press
• "Olympic Gender Drama-The Press Sisters". TransGriot (en inglés). 9 de novembro de 2011. Consultado o 18 de marzo de 2017. 
• Imaxe Arquivado 07 de maio de 2021 en Wayback Machine.