Paulette Goddard

Paulette Goddard

Biografía
Nacemento	(en) Marion Goddard Levy 3 de xuño de 1910 Queens, Estados Unidos de América
Morte	23 de abril de 1990 (79 anos) Ronco sopra Ascona, Suíza (pt)
Causa da morte	infarto agudo de miocardio
Lugar de sepultura	Tesino
Actividade
Ocupación	actriz, actriz de teatro, actriz de televisión, modelo, produtora, actriz de cinema
Período de actividade	1929 - 1972
Familia
Cónxuxe	Erich Maria Remarque (1958–1970), morte do cónxuxe Burgess Meredith (1944–1949) Charlie Chaplin (1936–1942)
Premios
estrela no Paseo da Fama de Hollywood

Pauline Marion Levy, coñecida polo nome artístico de Paulette Goddard, nada o 3 de xuño de 1910 en Nova York e finada o 23 de abril de 1990 en Ronco sopra Ascona, Ticino, Suíza, foi unha actriz de cinema estadounidense.

Traxectoria

Naceu en Whitestone Landing, Queens, Long Island. Foi a única filla de Joseph Russell Levy, xudeu, e Alta Mae Goddard, quen pertencía á igrexa episcopal e tiña ascendencia británica. Os seus pais divorciáronse cando ela era moi pequena, e foi criada pola súa nai. O seu pai practicamente desapareceu da súa vida, e regresou a finais da década de 1930, despois de que ela se volveu famosa. Ao principio, a súa nova relación co seu pai parecía moi boa e ían xuntos aos éxitos no cine, pero máis adiante el demandouna legalmente cando leu unha entrevista nunha revista onde afirmaba que el non era o seu pai e que a abandonou na súa infancia. Nunca se reconciliaron. Ao morrer, el deixoulle unicamente un dólar no seu testamento. Ela tivo sempre unha relación próxima coa súa nai.

Charles Goddard, o seu tío avó, axudou a súa sobriña neta a atopar emprego como modelo publicitaria, e logo, entre 1924 e 1928, unha das nenas Ziegfeld na compañía musical Ziegfeld Follies, de Florenz Ziegfeld. Asistiu á Preparatoria Washington Irving de Manhattan ao mesmo tempo que quen tamén sería actriz, Claire Trevor.

Tras casar cun millonario chamado Edgar James, trasladouse a vivir a Hollywood. A principios dos anos 30 participou en papeis secundarios en obras como City Streets (1931), de Rouben Mamoulian, con Gary Cooper e Sylvia Sidney, ou en The Kid from Spain (1932), de Leo McCarey, xunto a Eddie Cantor.

En 1936 rodou, xunto a Charlie Chaplin, Modern Times (1936), a última película na que aparece Charlot como personaxe. Despois de gravarse a película crese que casaron nunha cerimonia secreta, pero foi unha relación sentimental da cal nunca chegou a concretar nada publicamente, por acordo de ambos. Catro anos despois volveron rodar xuntos un novo filme, O gran ditador (1940), película crítica contra o nazismo alemán e, por extensión, contra todos os fascismos e ditaduras. Ambos os títulos conforman dúas das obras mestras do xenial director, o que non evitou que ese mesmo ano se rompese o matrimonio.

Estivo tamén casada co actor Burgess Meredith entre o 1944 e 1950 e finalmente con Erich Maria Remarque de 1958 ata 1970.