Jesús Joaquín Fernández Sáenz de la Torre

Suso
Información persoal
Nome	Jesús Joaquín Fernández Sáenz de la Torre
Nacemento	19 de novembro de 1993
Lugar de nacemento	Cádiz
Altura	1,76 m.
Posición	Extremo dereito
Información de club
Club actual	Sevilla
Número	7
Carreira xuvenil
2004–2010	Cádiz
2010–2012	Liverpool
Carreira sénior
Anos	Equipos	Aprs	(Gls)
2012–2015	Liverpool	14	(0)
2013–2014	→ Almería	33	(3)
2015–2020	Milan	126	(21)
2016	→ Genoa	19	(6)
2020	→ Sevilla	17	(1)
2020–	Sevilla	42	(3)
Selección nacional
2009–2010	España sub-17	7	(5)
2017–	España	5	(0)
2012	España sub-19	9	(1)
Na rede
Partidos e goles só en liga doméstica. Club: actualizado a 24 de agosto de 2022. Selección: actualizado a 24 de agosto de 2022.[ editar datos en Wikidata ]

Jesús Joaquín Fernández Sáenz de la Torre, coñecido como Suso, nado en Alxeciras o 19 de novembro de 1993), é un futbolista español que xoga como extremo dereito no Sevilla.

Incorporado ao Liverpool inglés sendo adolescente, debutou co primeiro equipo na Premier League en 2012. Despois de xogar cedido no Almería, foi traspasado en 2015 ao Milan, ao que pertenceu ata 2020, xogando tamén varios meses cedido no Genoa e no Sevilla. A continuación foi traspasado de xeito permanente ao Sevilla.

Campión da Eurocopa sub-19 coa selección española sub-19, foi tamén internacional coa selección española absoluta, coa que disputou cinco encontros entre 2017 e 2019.

Traxectoria

Liverpool

Formouse na canteira do Cádiz antes de ingresar en 2010 na do Liverpool inglés. Debutou co primeiro equipo nun amigable de pretemporada contra o Borussia Mönchengladbach o 1 de agosto de 2010, e disputou tamén o partido homenaxe a Jamie Carragher o 4 de setembro.

No día do seu 17º aniversario asinou o seu primeiro contrato profesional cos Reds, aínda que continuou xogando no equipo filial.

O 20 de setembro de 2012, disputou o seu primeiro partido oficial co Liverpool, xogando de titular contra o Young Boys na Europa League. Debutou na Premier League tres días despois, nunha derrota por 1-2 ante o Manchester United en Anfield, substituíndo ao lesionado Fabio Borini no descanso e completando unha grande actuación persoal. Disputou 20 encontros co primeiro equipo, pero tralas incorporacións de

Daniel Sturridge e Philippe Coutinho, regresou ao equipo sub-21.

Cesión ao Almería

Suso (no centro) coa camiseta do Almería nun partido contra o Atlético de Madrid en setembro de 2013.

En xullo de 2013 regresou a Andalucía, cedido por unha tempada ao Almería da Primeira División. Debutou nun partido ante o Villarreal, dándolle unha asistencia a Rodri no segundo gol do equipo, que acabou perdendo por 2-3. Marcou o seu primeiro gol na quinta xornada ante o Levante. Rematou a tempada con 35 partidos, 3 goles e 9 asistencias, contribuíndo á salvación do equipo.

Regreso a Liverpool

A continuación volveu ao Liverpool, co que só disputou uns poucos minutos nun partido da Copa da Liga contra o Middlesbrough en Anfield, saltando ao campo no minuto 98, en plena prórroga, e marcando o seu primeiro e único gol co club. Anotou ademais dous lanzamentos na posterior quenda de penaltis, que rematou 14-13, e na que el mesmo lanzou o penalti gañador.

Milan

Tempada 2014/15

En xaneiro de 2015 asinou un contrato de catro anos co Milan italiano Debutou o 27 de xaneiro nos cuartos de final da Copa Italia, nunha derrota por 0-1 en San Siro diante da Lazio, substituíndo a Michelangelo Albertazzi nos últimos dez minutos de encontro. Xogou o seu primeiro partido na Serie A ante o Palermo, e disputou un total de 5 encontros na competición esa tempada.

Cesión ao Genoa

Coa chegada de Siniša Mihajlović ao banco do Milan na tempada 2015-16, Suso non tivo sitio no primeiro equipo, e en xaneiro, despois de ter disputado só dous encontros, saíu cedido ao Genoa.

O 3 de abril de 2016 marcou tres goles ante o Frosinone no Stadio Luigi Ferraris e entrou na historia como o segundo español en lograr un triplete na Serie A, máis de medio século despois de que o galego Luis Suárez lle fixese tres goles ao Genoa coa camiseta do Inter de Milán en 1963.

Regreso a Milán

Suso co Milan nun amigable diante do Bayern de Múnic en 2016.

De volta en Milán converteuse en titular indiscutible no equipo que agora adestraba Vincenzo Montella.

O 23 de decembro de 2016 deulle o pase de gol a Giacomo Bonaventura na Supercopa italiana para empatar o encontro fronte á Juventus. Máis tarde converteu o seu penalti na quenda resultante, o que levou ao Milan á vitoria por 4-3.

Concluíu a tempada 2016/17 con 37 encontros, 7 goles e 9 asistencias. Mantivo números semellantes durante as dúas seguintes tempadas, e acadou os 153 partidos oficiais co club, nos que sumou 24 goles e 36 asistencias.

Sevilla

En xaneiro de 2020 foi cedido ao Sevilla cun contrato por 18 meses, que incluía unha cláusula de compra obrigatoria. En xullo de 2020, pasou a ser xogador en propiedade do club hispalense, co que asinou un contrato por cinco anos. Un mes despois marcou un dos goles na vitoria por 2-1 sobre o Manchester United nas semifinais da Europa League e foi titular na final que o seu equipo gañou ante o Inter de Milán.

Selección nacional

Suso coa selección española sub-19 en 2012.

Representou a España nas categorías sub-17, sub-18, sub-19, sub-20 e sub-21. En 2012 foi titular en tódolos partidos do Campionato europeo sub-19, onde gañou o seu primeiro título internacional. Tamén foi o capitán da selección española sub-20 que disputou o Mundial Sub-20 de 2013.

En 2017 recibiu as súas primeiras convocatorias absolutas coa selección española, coa que debutou nun amigable contra Rusia o 14 de novembro dese ano.

Palmarés

Milan

• Supercopa italiana (1): 2016.

Sevilla

• Europa League (1): 2019/20.

Selección española sub-19

• Campionato Europeo sub-19 (1): 2016.

Véxase tamén

Ligazóns externas

• Datos do xogador en lfchistory.net (en inglés).
• Datos do xogador no sitio web do Sevilla FC (en castelán).