Felipe Criado Martín
  | |
| Biografía | |
|---|---|
| Nacemento | 8 de xaneiro de 1928 Xixón, España |
| Morte | 23 de novembro de 2013 (85 anos) Mera, España |
| Educación | Real Academia de Belas Artes de San Fernando |
| Actividade | |
| Ocupación | pintor, mestre, crítico de arte |
| Membro de | |
| Familia | |
| Fillos | Felipe Criado Boado |
 | |
Felipe Criado Martín, nado en Xixón o 8 de xaneiro de 1928 e finado en Mera (Oleiros) o 22 de novembro de 2013 foi un pintor, profesor e crítico de arte español da posguerra, destacado polas súas obras en distintos soportes e polo seu dominio do debuxo.[1][2][3]
Traxectoria
[editar | editar a fonte]Fillo de pais casteláns, Felipe Criado naceu en Xixón, mais debido á carreira militar do seu pai, carabineiro, vive a súa nenez en Asturias, Cataluña e Santander antes de instalarse en Galicia. Comezou a carreira de medicina na Universidade de Santiago de Compostela, pero abandonou os estudos para aprender modelado no obradoiro do escultor Francisco Asorey e na Escola de Artes e Oficios de Santiago. En 1954 ingresou na Escola da Academia de Belas Artes de San Fernando en Madrid (1954-1959), onde compartiu formación con pintores como Antonio López, Lucio Muñoz, Amalia Avia ou Isabel Quintanilla.[4] De volta na capital galega, colaborou como crítico de arte no periódico La Noche. En 1961 gañou a cátedra de Anatomía Artística na Escola de Artes e Oficios compostelá e dous anos despois, a cátedra de Debuxo para centros de ensino medio. Desenvolveu a súa actividade docente en Santiago e posteriormente na Coruña, onde se instala en 1967.
Ao longo da súa traxectoria realizou varias exposicións individuais e colectivas, tanto en Galicia (Museo do Pobo Galego, Fundación Caixa Galicia, Galería Ceibe, Sala Giannini, etc.) coma noutras cidades españolas e estranxeiras (Madrid, Málaga, Oviedo, Huesca, Xixón, Barcelona, Os Ánxeles, Santiago de Chile, Río de Xaneiro, etc.). As obras de Felipe Criado pódense atopar en distintos espazos expositivos como o Museo do Pobo Galego, o Centro Galego de Arte Contemporánea, o Instituto Cervantes, o Museo de Belas Artes da Coruña, o Museo Provincial de Lugo, o Museo Quiñones de León e a Real Academia Galega de Belas Artes, entre outros.
Foi membro da Real Academia Galega de Belas Artes desde 1996 e recibiu importantes galardóns como a medalla de prata da Exposición Trienal de Pintura de Santiago.[3][4]
Obra
[editar | editar a fonte]A pintura de Felipe Criado pertence ao expresionismo neobarroquista; é lúdica, alegre, expresiva, e ten como base un magnífico deseño e unha paleta rica e quente. Paisaxista nas súas primeiras obras, foi incorporando co tempo a figura humana, en especial a feminina, sobre a que "equilibra a realidade e a fantasía", "o mundo tanxible" e "o mundo irreal" dos soños. Sinoptiza as súas criaturas nun alarde de curvas de excelente composición rítmica, dotándoas dunha ironía moi peculiar [4][5].
Amais de distinguirse no debuxo e a pintura, traballou o mural, o gravado e o deseño de cerámica.
Notas
[editar | editar a fonte]- ↑ "Felipe Criado (1928-2013). El pincel que reinvento el desnudo". Consultado o 25 de marzo de 2018.
- ↑ "Fallece el pintor gallego Felipe Criado Martín a los 85 años". Consultado o 24 de marzo de 2018.
- ↑ 3,0 3,1 Galicia Digital (ed.). "Felipe Criado". Consultado o 24 de marzo de 2018.
- ↑ 4,0 4,1 4,2 ABANCA. Colección de arte (ed.). "Criado Martín, Felipe". Arquivado dende o orixinal o 25 de marzo de 2018. Consultado o 24 de marzo de 2018.
- ↑ "FELIPE CRIADO - Afundación". www.afundacion.org. Consultado o 2020-04-09.
