Escudo portugués

Para outras páxinas con títulos homónimos véxase: Escudo (homónimos).

Para o escudo de Portugal véxase: Escudo de Portugal.

Escudo portugués †
Escudo português en portugués
Código:	PTE
Ámbito:	Portugal
Símbolo:	$\mathrm {S} \!\!\!\Vert$ ou $ cando o outro non está dispoñible
Fracción:	100 centavos
Moedas:	1, 2, 5, 10, 20 e 50 centavos (non emitidas) 1, 5, 10, 20, 50, 100 e 200 Escudos
Billetes:	500, 1000, 2000, 5000 e 10000 Escudos
Emisor:	Banco de Portugal
Taxa de troco: fixa	1 EUR = 200,482 PTE
Oficial até o 01-01-2002

1 escudo (1987)

20 escudos (1987)

200 escudos (1991)

O Escudo portugués, simbolizado polo cifrão (como o símbolo do dólar [$], pero con dúas barras verticais), foi a moeda oficial de Portugal antes do euro. O escudo deu orixe a outras variacións de Escudo nas colonias portuguesas africanas e asiáticas.

O seu código segundo a norma ISO 4217 é PTE.

A seu nome provén da imaxe que aparecía representada nas primeiras moedas dese valor: un escudo. Eran de ouro de 18 quilates, e valía 50 marcos.

Malia que o euro entrou en vigor o 1 de xaneiro de 2002, o escudo tivo validez ata o 28 de febreiro dese mesmo ano. A taxa de conversión entre escudos e euros foi establecida o 31 de decembro de 1998, sendo fixado o valor de 1 euro en 200,482 escudos.

Historia

No reinado de Duarte de Portugal apareceu o medio-escudo de ouro, do que non se coñece nin o deseño. No reinado de Xoán V cuñáronse tamén as dobras, múltiplos do escudo. Tamén nos reinados de Xosé I, María I e Xoán VI se cuñaron escudos.

O decreto do 22 de maio de 1911 reformou profundamente, baixo o punto de vista técnico, o sistema monetario vixente en Portugal, alterando a denominación de tódalas moedas, o material, o peso, e as dimensións das pezas de bronce, e substituíu o real polo escudo de ouro. Dividido en 100 partes iguais, denominadas "centavos", o escudo correspondía, tanto no valor como no peso de ouro fino, á moeda de 1.000 réis. Como múltiplos, creáronse moedas de ouro, que nunca se chegaron a cuñar, de 2, 5 e 10 escudos, e como submúltiplos, moedas do valor legal de 10, 20 e 50 centavos, e moedas subsidiarias de bronce e níquel de valor legal de 4, 2, 1 e ½ centavos, que, agás a última, chegaron a ser cuñadas.

Despois de 1914, debido á crise provocada pola primeira guerra mundial, o escudo-papel (billetes) experimentou un descenso vertixinoso de valor, acadando a súa menor correspondencia en ouro en xullo de 1924. Desde o segundo semestre de 1926 ata abril de 1928 o escudo sufriu novas desvalorizacións, como consecuencia de dous aumentos de circulación, do agravamento da débeda flutuante interna e externa, e do case total esgotamento das reservas de ouro que o Tesouro Nacional posuía en Londres.

Polo decreto nº 19.869 do 9 de xuño de 1931 lanzáronse as bases dun novo sistema monetario, para manter a estabilización do valor desta moeda. O escudo de ouro continuaba sendo a unidade monetaria, mais cun peso inferior, servindo apenas como moeda-padrón.

Moedas

As moedas en circulación antes da chegada do euro eran as seguintes:

• 1 escudo
• 5 escudos
• 10 escudos
• 20 escudos
• 50 escudos
• 100 escudos
• 200 escudos

Billetes

Última serie

A última serie de cédulas portuguesas, composta de cinco valores, estaba dedicada a importantes navegantes da época dos descubrimentos portugueses.

Última serie

Denominación	Cor predominante	Dimensións	Descrición do anverso	Descrición do reverso
500 escudos	Vermello e marrón	125 x 68 mm	João de Barros	Dous navegantes da época e dous navíos pequenos
1.000 escudos	Violeta e marrón	132 x 68 mm	Pedro Álvares Cabral	Unha carabela e de fondo unha selva.
2.000 escudos	Azul	139 x 68 mm	Bartolomeu Dias	Unha carabela, a rosa dos ventos e un compás; de fondo un mapa antigo de África e Europa.
5.000 escudos	Verde	146 x 75 mm	Vasco da Gama	Unha carabela e un conxunto de personaxes da época.
10.000 escudos	Vermello e ocre	153 x 75 mm	Infante Henrique	Unha carabela.

Véxase tamén

Ligazóns internas

• Imprensa Nacional-Casa da Moeda

Ligazóns externas

• Banco de Portugal