Comisión de Banca, Vivenda e Asuntos Urbanos do Senado dos Estados Unidos
| Comisión de Banca, Vivenda e Asuntos Urbanos do Senado dos Estados Unidos | |||||||||||
|---|---|---|---|---|---|---|---|---|---|---|---|
| |||||||||||
| |||||||||||
| |||||||||||
| |||||||||||
| Wikidata | |||||||||||
A Comisión de Banca, Vivenda e Asuntos Urbanos do Senado dos Estados Unidos (denominada ata 1970 Comisión de Banca e Moeda) é unha das vinte comisións do Senado estadounidense encargadas de xestionar os asuntos desta cámara relacionados con áreas especializadas de interese lexislativo.[1]
A comisión ten competencias sobre asuntos relacionados cos bancos e a banca, o control de prezos, o seguro de depósitos, a promoción e o control das exportacións, a política monetaria federal, a axuda financeira ao comercio e á industria, a amortización de billetes, a moeda e a súa cuñaxe, a vivenda pública e privada, o desenvolvemento urbano, o transporte público e os contratos gobernamentais.[1]
En 2024 está composta por 23 senadores, 12 do Partido Demócrata e 11 do Partido Republicano. O presidente da comisión é o demócrata Sherrod Brown, de Ohio, e o membro de maior rango é o republicano Tim Scott, de Carolina do Sur.[1]
Historia
[editar | editar a fonte]Antecedentes e contexto
[editar | editar a fonte]Esta comisión é unha das vinte de carácter permanente do Senado dos Estados Unidos. Ata 1913, o Senado funcionara sen unha comisión bancaria, en tanto que a Cámara de Representantes constituíra a súa Comisión de Moeda, Pesos e Medidas xa en 1865. Ata entón, os asuntos de banca e moeda derivábanse á Comisión de Finanzas.[2][3]
.jpg)
Durante os seis anos que seguiron a crise económica de 1907, os líderes de ambas as cámaras do Congreso dos Estados Unidos viron a necesidade dun sistema que impedise que uns poucos grandes bancos de Nova York controlasen a maioría dos activos financeiros do país. Un informe da Cámara de Representantes de febreiro de 1913 sobre este asunto levou o Senado á conclusión de que precisaba a dedicación a tempo completo dunha comisión independente sobre banca e moeda.[2]
Comisión de Banca e Moeda (1913-1970)
[editar | editar a fonte]Neste contexto, en marzo de 1913, cunha maioría demócrata no senado e un presidente tamén demócrata, Woodrow Wilson, acabado de elixir, acordouse a creación da "Comisión de Banca e Moeda do Senado", que se constituíu formalmente o día 22 de maio. O senador Robert L. Owen, de Oklahoma, promotor da Lei da Reserva Federal, foi elixido como o presidente inaugural da comisión.[1][2][3]
Ademais da propia Lei da Reserva Federal (1913), o Comité de Banca e Moeda participou na tramitación de varias disposicións clave, como a Lei McFadden (1927), que estableceu a regulación estatal dos seguros e prohibiu a banca interestatal; a Lei Glass-Steagall (1933), que separou a banca comercial da de investimento; a Lei Bancaria (1935), que formalizou o seguro federal de depósitos e converteu a Corporación Federal de Seguro de Depósitos (FDIC) nunha axencia gobernamental; a Lei de Sociedades Posuidoras de Bancos (1956), que someteu estas sociedades á supervisión federal; e a Lei de Fusións Bancarias (1966), que estableceu normas uniformes para que as axencias bancarias, o Departamento de Xustiza e os tribunais avaliasen a legalidade das fusións.[3]
Comisión de Banca, Vivenda e Asuntos Urbanos (dede 1970)
[editar | editar a fonte]O 26 de outubro de 1970, o 95º Congreso decidiu substituír a antiga Comisión de Banca e Moeda pola actual de Banca, Vivenda e Asuntos Urbanos.[3]
_(cropped).jpg)
Neste segundo período da comisión, tramitáronse disposicións tan sinaladas como, entre outras moitas, a Lei de Desregulación e Control Monetario das Institucións Depositarias (1980); a Lei de Igualdade Competitiva Bancaria (1987); ou a Lei para a Unión e o Fortalecemento dos Estados Unidos, mediante a dotación dos instrumentos necesarios para interceptar e obstruír o terrorismo ("Lei USA Patriot", de 2001).[3]
Xurisdición
[editar | editar a fonte]Consonte o artigo XXV do Senado dos Estados Unidos, remítense á Comisión de Banca, Vivenda e Asuntos Urbanos do Senado todos os proxectos de lei, as mensaxes, as peticións de conmemoracións e outros asuntos relacionados cos seguintes temas:[4]
- Bancos, banca e institucións financeiras.
- Control dos prezos dos produtos básicos, alugueiros e servizos.
- Seguro de depósitos.
- Estabilización económica e produción de defensa.
- Fomento das exportacións e do comercio exterior.
- Control das exportacións.
- Política monetaria federal, incluído o Sistema da Reserva Federal.
- Axuda financeira ao comercio e á industria.
- Emisión e amortización de papel moeda.
- Diñeiro e crédito, o que inclúe a moeda e a súa cuñaxe.
- Construción de residencias de anciáns.
- Vivendas públicas e privadas (incluídas as vivendas para veteranos).
- Renegociación de contratos públicos.
- Desenvolvemento urbano e transporte público.
A Comisión de Banca, Vivenda e Asuntos Urbanos do Senado tamén se encarga de "estudar e revisar con exhaustividade os asuntos relacionados coa política económica internacional na medida en que afecte os asuntos monetarios, o crédito e as institucións financeiras dos Estados Unidos, o crecemento económico, os asuntos urbanos e o crédito; así como informar ao respecto".[4]
Presidentes da Comisión
[editar | editar a fonte]Estes son os senadores que ocuparon a presidencia da Comisión, desde a súa fundación en 1913:[5]
Comisión de Banca e Moeda
[editar | editar a fonte]| Membro do Senado | Partido político | Estado reprtesentado | Período |
|---|---|---|---|
| Robert L. Owen | Demócrata | Oklahoma | 1913-1918 |
| George P. McLean | Republicano | Connecticut | 1919-1926 |
| Peter Norbeck | Dacota do Sur | 1927-1932 | |
| Duncan U. Fletcher | Demócrata | Florida | 1933-1936 |
| Robert F. Wagner | Nova York | 1937-1946 | |
| Charles W. Tobey | Republicano | Nova Hampshire | 1947-1948 |
| Burnet R. Maybank | Demócrata | Carolina do Sur | 1949-1952 |
| Homer E. Capehart | Republicano | Indiana | 1953-1954 |
| J. William Fulbright | Demócrata | Arcansas | 1955-1959 |
| A. Willis Robertson | Virxinia | 1959-1966 | |
| John J. Sparkman | Alabama | 1967-1970 |
Comisión de Banca, Vivenda e Asuntos Urbanos
[editar | editar a fonte]| Membro do Senado | Partido político | Estado reprtesentado | Período |
|---|---|---|---|
| John J. Sparkman | Demócrata | Alabama | 1970-1975 |
| William Proxmire | Demócrata | Wisconsin | 1975-1980 |
| Jake Garn | Republicano | Utah | 1981-1986 |
| William Proxmire | Demócrata | Wisconsin | 1987-1988 |
| Donald W. Riegle | Míchigan | 1989-1994 | |
| Alfonse M. D'Amato | Republicano | Nova York | 1995-1998 |
| Phil Gramm | Texas | 1999-2001 | |
| Paul S. Sarbanes | Demócrata | Maryland | 2001-2002 |
| Richard C. Shelby | Republicano | Alabama | 2003-2006 |
| Christopher J. Dodd | Demócrata | Connecticut | 2007-2010 |
| Tim Johnson | Republicano | Dacota do Sur | 2011-2014 |
| Richard C. Shelby | Alabama | 2015-2016 | |
| Mike Crapo | Idaho | 2017-2020 | |
| Sherrod Brown | Demócrata | Ohio | 2021- |
Notas
[editar | editar a fonte]- 1 2 3 4 "About". United States Committee on Banking, Housing, and Urban Affairs (Banking.senate.gov).
- 1 2 3 "Senate Banking Committee Established. March 15, 1913". United States Senate (Senate.gov).
- 1 2 3 4 5 "A History of the Senate Banking Committee". United States Capitol Historical Society (Capitolhistory.org).
- 1 2 "Jurisdiction". United States Committee on Banking, Housing, and Urban Affairs (Banking.senate.gov).
- ↑ "History of the Chairmen of the Senate". United States Committee on Banking, Housing, and Urban Affairs (Banking.senate.gov).
