Aríidos

A dos aríidos (Ariidae) é unha familia de peixes actinopterixios da orde dos siluriformes.

Taxonomía

Descrición

A familia foi descrita en 1858 polo naturalista, anatomista comparativo e ictiólogo neerlandés Pieter Bleeker.

Etimoloxía

O nome científico Ariidae está formado, segundo a norma, sobre a base do xenitivo do nome do seu xénero tipo, Arius, coa adición do sufixo do latín científico -ĭdae, propio dos nomes das familias de animais.

Clasificación

A famila está subdividida en tres subfamilias, cos xéneros que se indican a continuación:

• Subfamilia Ariinae Bleeker, 1858
  • Amissidens Kailola, 2004
  • Amphiarius Marceniuk & Menezes, 2007
  • Arius Valenciennes, 1840
  • Aspistor Jordan & Evermann, 1898
  • Batrachocephalus Bleeker, 1846
  • Carlarius Marceniuk & Menezes, 2007
  • Cathorops Jordan & Gilbert, 1883
  • Cephalocassis Bleeker, 1857
  • Chinchaysuyoa Marceniuk, Marchena, Oliveira & Betancur-R., 2019
  • Cinetodus Ogilby, 1898
  • Cochlefelis Whitley, 1941
  • Cryptarius Kailola, 2004
  • Genidens Castelnau, 1855
  • Hemiarius Bleeker, 1862
  • Hexanematichthys Bleeker, 1858
  • Ketengus Bleeker, 1847
  • Nedystoma Ogilby, 1898
  • Nemapteryx Ogilby, 1908
  • Neoarius Castelnau, 1878
  • Netuma Bleeker, 1858
  • Notarius Gill, 1863
  • Occidentarius Betancur-R. & Acero P., 2007
  • Osteogeneiosus Bleeker, 1846
  • Plicofollis Kailola, 2004
  • Potamarius Hubbs & Miller, 1960
  • Sciades Müller & Troschel, 1849
• Subfamilia Bagreinae Schultz, 1944
  • Bagre Cloquet, 1816
• Subfamilia Galeichthyinae Acero & Betancur-R., 2007
  • Galeichthys Valenciennes, 1840

Distribución e hábitat

Encóntranse nos mares e océanos de clima tropical e subtropical que rodean as Américas, África, Asia e Australia, estando ausentes en Europa e na Antártida.

Son principalmente peixes mariños e de augas salobres, pero moitas especies poden adentrarse en auga doce, e incluso algunhas especies soamente poden vivir neste último medio.

Características

Presentan placas óseas na cabeza e cerca da aleta dorsal. Son de tamaño de mediano a grande; de corpo alongado e robusto. A cabeza é cónica, arredonada e aplanada; os dentes son finos, cónicos ou granulares, os palatinos en pequenas ou grandes placas; os orificios nasais están moi xuntos; teñen dous, catro ou seis barbas ou bigotes en torno á boca, un par maxilar, un mandibular e outro no mento; de cinco a sete raios branquiostegos; o dorso da cabeza está parcialmente cuberto por un escudo óseo visíbel a trasvés da pel na maioría das especies, o cal pode ser liso, rugoso, estriado ou granuloso, e a súa rexión posterior esténdese até a placa predorsal. A aleta caudal profundamente bifurcada; teñen unha aleta adiposa detrás da dorsal; as aletas pectorais e dorsais presentan espiñas ríxidas e fortes. A liña lateral é completa.

Algunhas especies teñen espiñas velenosas nas aletas pectorais e dorsal.

Bioloxía

Aliméntanse de peixes pequenos e dunha gran variedade de invertebrados bentónicos, como gambas, cangrexos e moluscos.

Os machos xeralmente incuban os ovos dentro da súa boca, até o momento da eclosión.

Véxase tamén

Bibliografía

• Nelson, J. S. (2006): Fishes of the World (4ª ed.) Hoboken, Nova Jersey: John Wiley & Sons, Inc. ISBN 978-0-4712-5031-9.

Outros artigos

• Siluriformes