Antanas Žukauskas

Antanas Žukauskas

(2009)
Biografía
Nacemento	9 de marzo de 1939 Pienionys, Lituania (en)
Morte	27 de abril de 2022 (83 anos) Vilnius, Lituania
Lugar de sepultura	Antakalnis Cemetery (en)
Actividade
Ocupación	escultor

Antanas Žukauskas, nado en Pienionys, Utena, o 9 de marzo de 1939, e finado en Vilnius o 27 de abril de 2022, foi un escultor, medallista e deseñador de moedas lituano, coñecido polo seu deseño dos anversos nacionais da serie de moedas en euros de Lituania.

Traxectoria

Primeiros anos e formación

Antanas Žukauskas foi o menor de tres irmáns no seo dunha familia labrega e criuouse na localidade de Bikūnai en Anykščiai, en cuxo instituto curso o ensino secundario, do que se graduou en 1959.

De 1960 a 1966 cursou estudos superiores artísticos na Academia de Artes de Vilnius, na especialidade de Escultura, tendo como mestre a Juozas Kėdainis.

Escultura

A súa primeira experiencia laboral foi ao servizo do Ministerio de Cultura da República Socialista Soviética de Lituania, entre 1966 e 1970. A partir dese ano Žukauskas instalouse como artista independente e en 1974 integrouse na Asociación de Artistas Lituanos.

Xa desde 1964 participou en numerosas exposicións de arte tanto en Lituania como no estranxeiro. As súas obras atópanse en moitas coleccións, como as do Museo de Arte Lituana, o Museo Nacional de Lituania, a Fundación da Asociación de Artistas Lituanos, o Museo Vydūnas de Detmold, os Museos Vaticanos, a Galería Tretyakov de Moscova ou o Museo Balzekas de Cultura Lituana de Chicago.

Žukauskas foi un creador prolífico de esculturas e relevos para espazos públicos, como a decoración escultórica do Teatro Nacional de Ópera e Ballet de Lituania, en Vilnius, así como outros monumentos, lápidas, etc.

Medallística e deseño de moeda

En 1984, Antanas Žukauskas creou unha medalla para conmemorar o 500 aniversario da morte do santo nacional lituano, San Casimiro, co seu retrato no anverso e unha oración á Virxe María no reverso. Esta medalla era a única medalla oficial de tema relixioso na Unión Soviética.

Ademais, Žukauskas deseñou entre 1995 e 2005 varias moedas, tanto circulantes como conmemorativas, do sistema do litas para o Banco de Lituania e a Casa da Moeda de Lituania. No entanto, a obra que lle supuxo un maior recoñecemento internacional foi o deseño dos anversos nacionais comúns a toda a serie circulante de moedas do euro de Lituania, que entrou en circulación en 2015, co cabaleiro Vytis ("O Perseguidor) extraído do escudo de Lituania.

Escolma de traballos

Esculturas

Escultura á maternidade (Motinystė) en Plungė (1972).

• Escultura-fonte Pumpuras de granito rosa, en Vilnius (1979).
• Anūkas, no Parque das Esculturas de Klaipeda (1985).
• Dez esculturas de bronce da fachada do Teatro Nacional de Ópera e Ballet de Lituania en Vilnius (1989).
• Monumento a Jonas Basanavičius en Vilkaviškis (1996).
• Monumento a Vincas Kudirka en Vilkaviškis (1998).

Moedas do litas lituano

• 
  1 litas (1997).
• 
  2 litai (2012).
• 
  5 litai (1998).
• 
  50 litu (1999).

Moedas do euro

• 
  2 euros (2015).
• 
  1 euro (2015).
• 
  50 céntimos (2015).
• 
  5 cémtimos (2015).

Véxase tamén

Outros artigos

• Lista de deseñadores das moedas de euro