.gal

.gal
Ano de creación	2009-2010
En servizo desde	comezos do 2014
Tipo	dominio de primeiro nivel
Estado	aprobado
Rexistrador	?
Patrocinador	?
Finalidade	Webs galegas e en galego
País	Galicia, España
Web	Asociación PuntoGal

O dominio .gal é un dominio de internet de primeiro nivel que forma parte do sistema de dominios de internet patrocinados (sponsored TLD en inglés) para a lingua galega e a súa cultura. Foi aprobado oficialmente pola ICANN o 14 de xuño de 2013. O novo dominio será utilizado para webs en galego fundamentalmente, tal e como está determinado nas normas da ICANN. Ata o de agora, o máis común era usar os dominios .es, .org, .eu, .com, etc.

O caso do dominio catalán

A aprobación do dominio catalán, o .cat. Para acadar este dominio foi fundamental a suma de todas as vontades da sociedade civil, empresarial, e política catalá. Unha cantidade de asociacións culturais, empresariais, e fundacións, así como persoas de toda condicións sumáronse a tal proxecto, que contou cun importante apoio institucional, contando co apoio do Estado español, ao ser consultado pola ICANN.

Asociación Puntogal

Puntogal (de ".gal") é unha asociación sen ánimo de lucro cuxa finalidade é a creación dun dominio de internet patrocinado específico para a cultura galega. Constituíuse o 10 de xuño de 2006 e está formada por varias institucións e asociacións galegas; propón o uso do dominio de primeiro nivel .gal para as páxinas en galego. Está presidida por Manuel González González (director do Instituto da Lingua Galega e secretario da Real Academia Galega).

O dominio ".gal" correspondería á comunidade galega, nun senso xeral, en función dun criterio de ser unha comunidade con fortes vencellos (lingüísticos, culturais, históricos, sociais), e independentemente de ningún criterio xeográfico. A proposta puntogal non está relacionada coa proposta dun dominio xeográfico de dúas letras (.gz, por exemplo), dominios para os que é necesario ser un estado recoñecido polas Nacións Unidas ou algunha das súas axencias.

Recoñecementos

O 16 de novembro de 2007 foille entregado o Premio Xoan Manuel Pintos concedido polo Concello de Pontevedra e a Rede de Entidades Amigas da Lingua (REAL).

Historia

Anuncio da aprobación do novo dominio .gal o sábado 15 de xuño de 2013 en Santiago de Compostela.

O dez de xuño de 2006 foron varias as entidades fundadoras da asociación que puxeron en marcha a candidatura. Naquel pequeno acto sentáronse as bases que mantiveron vivo o proxecto durante este sete anos. Entre elas, o propósito firme de que a entidade que xestionará o dominio se autofinancie e reinvista os beneficios obtidos en promover a lingua e a cultura galegas. O .gal foi apoiado pola Real Academia Galega ó Consello da Cultura pasando polas tres universidades, os distintos gobernos da Xunta de Galicia, centros de investigación, asociacións de empresas de novas tecnoloxías, colexios profesionais, medios de comunicación e por ducias de colectivos de base, a candidatura do dominio sentiuse sempre respaldada pola sociedade con máis de 12.000 apoios. Dentro e fóra. Máis de vinte asociación de galegos no exterior de países como Estados Unidos, Brasil, Portugal, Francia, Suíza, Alemaña, Bélxica, Arxentina ou Uruguai están tamén detrás do dominio.

Cronoloxía

• O 14 de xuño de 2013 o dominio foi aprobado oficialmente.
• A ICANN activou o primeiro dominio .gal (nic.gal) e delegou a súa xestión á Asociación Puntogal o 12 de abril de 2014.

Véxase tamén

Outros artigos

• .cat
• .eus

Ligazóns externas

• Páxina web oficial
• Estatutos da asociación
• Galicia consegue o .gal
• Web do ICANN (icann.org) (en inglés)