Vítor Manuel Fernandes dos Santos
Biografía | |
---|---|
Nacemento | 1946 (77/78 anos) Oeiras, Portugal |
Datos persoais | |
País de nacionalidade | Portugal |
Educación | Universidade de Lisboa |
Actividade | |
Ocupación | escultor |
Lingua | Lingua portuguesa |
Vítor Manuel Fernandes dos Santos (coñecido artisticamente como Vítor Santos), nado en Algés, Oeiras, en 1946,[1] é un escultor, medallista e deseñador de moedas portugués coñecido por ser o creador dos anversos da primeira serie de moedas do euro de Portugal.
Traxectoria[editar | editar a fonte]
Vítor Santos cursou estudos superiores de Escultura na Facultade de Belas Artes da Universidade de Lisboa (FBAUL), onde despois acadou un mestrado en Deseño.[2] Posteriormente formouse como deseñador e gravador litográfico na Escola de Artes Decorativas António Arroio, da mesma cidade.[3]
Como medallista foi un dos fundadores do grupo de escultores medallistas Anverso/Reverso e é membro da Federación Internacional da Medalla de Arte (FIDEM). A súa obra está en varias coleccións particulares e en institucións como o Museo Británico, onde se expón a súa medalla do 50 aniversario da Polyphonia Schola Cantorum.[3][4]
A primeira moeda deseñada por Fernandes dos Santos foi a bimetálica de 100 escudos cuñada pola Imprensa Nacional-Casa da Moeda en 1997 en conmemoración da Exposición Mundial de Lisboa de 1998.[5]
Logo da integración de Portugal na Eurozona, Vítor Manuel Fernandes dos Santos foi o vencedor do concurso nacional para os deseños dos anversos nacionais das moedas de euro portuguesas.[2] O deseñador inspirouse para iso nos selos reais do primeiro rei de Portugal, Afonso Henriques: na de dous euros e na dun euro, o selo real de 1144; nas de 50, 20 e 10 céntimos, o selo real de 1142; e nas de 5, 2 e 1 céntimo, o primeiro selo real, de 1134.[7][8][9]
Ademais das moedas ordinarias en circulación, Fernandes dos Santos encargouse tamén dos deseños de diversas moedas conmemorativas cuñadas en metais nobres destinadas ao coleccionismo e ao investimento.[8] Entre elas, a moeda de ouro de cinco euros conmemorativa dos 150 anos do primeiro selo postal portugués, emitida en 2003,[10] foi premiada na XXIII Conferencia de Directores de Ceca (San Francisco, 2004) como a moeda conmemorativa con acabamento proof tecnicamente máis avanzada.[3][11]
Notas[editar | editar a fonte]
- ↑ "Colecção EROS. Os autores". Escultor.com.pt
- ↑ 2,0 2,1 "Vítor Santos: Desenhar a moeda foi importante, mas não trouxe reconhecimento". En Diário de Notícias. 29 de decembro de 2011.
- ↑ 3,0 3,1 3,2 "Vitor Manuel Fernandes Santos: Curriculum Vitae". Escultor.com.pt
- ↑ "Vitor Santos". The British Museum.
- ↑ "100 Escudos Expo 98". Numista.com
- ↑ "1 Euro 2nd map". Numista.com.
- ↑ "Portugal". Banco Central Europeu. Eurosistema.
- ↑ 8,0 8,1 Moedas do euro deseñadas por Vítor Manuel Fernandes dos Santos / V. M. F. dos Santos. Numista.com
- ↑ "Moeda corrente > Euro". Imprensa Nacional-Casa da Moeda.
- ↑ "5 Euro First Portuguese Stamp; Gold". Numista.com
- ↑ "Moeda corrente > Euro > Prémios e galardões atribuídos à ". Imprensa Nacional-Casa da Moeda.