Serie 121 de Renfe
.JPG)
A serie 121 de Renfe ou AVR (Ancho Variable Rexional) é unha familia de trens automotores eléctricos de alta velocidade de largo variábel fabricados por CAF e Alstom. Realizan servizos denominados Avant, MD e Rexionais dentro da área de Media Distancia de Renfe Operadora, ademais de servizos Intercity.
Dispoñen de cambio de largo e poden operar con dúas tensións (3 kV cc e 25 kV ca). Teñen unha velocidade máxima de 250 km/h. Existe unha versión destinada a servizos de Longa Distancia, denominada serie 120.[1]
Descrición[editar | editar a fonte]
A serie foi deseñada posteriormente á versión de Longa Distancia, a serie 120, da que se diferencia en que todos os asentos dos 121 pertencen a unha única clase, e non existe cafetaría a bordo. A diferenza das primeiras unidades da serie 120, a 121 completa dispón do equipo eléctrico duplicado, condición de seguridade imprescindíbel para atravesar grandes túneles coma os de Guadarrama.
O sistema de tracción é distribuído, e os bogies son BRAVA (Bogie de Rodaxe de Ancho Variable). Pode cambiar de largo sen se deter en menos de 1 minuto. Os trens son bitensión, podendo circular por liñas de alta velocidade con ancho internacional a unha velocidade máxima de 250 km/h e por vías convencionais de ancho ibérico a 220 km/h. O cambio de ancho permítelle realizar servizos que discorren en parte por liñas de alta velocidade e en parte por liñas convencionais.
A serie 121, do mesmo xeito que a 120, é mantida por ACTREN mantemento ferroviario, sociedade conformada ao 51% por CAF e ao 49% por Renfe. Para o seu correcto mantemento e seguridade conta cun avanzado sistema de mantemento intelixente do seu bogie de ancho variable baseado en temperaturas e aceleracións correspondentes aos equipos e sistemas que compoñen os eixos e bogies do tren. O sistema de mantemento intelixente recibe o nome de ''A.Ou.R.A".[2] Actualmente é o sistema de mantemento automático intelixente máis avanzado no territorio español.[3]
Servizos[editar | editar a fonte]
Nun primeiro momento foron destinados a prestar servizo como AVE Lanzadeira entre Madrid-Chamartín, Segovia-Guiomar e Valladolid-Campo Grande así como a realizar unha relación rexional transversal en Andalucía entre Xaén e Cádiz, usando a LAV Madrid-Sevilla entre o Cambio de ancho de Alcolea e o Cambio de ancho de Marajabique dando uso á súa función de largo variábel. Nestes momentos, utilízase en Galiza esta serie nas seguintes rutas:
- Avant Ourense ↔ A Coruña
- MD A Coruña ↔ Vigo-Urzáiz
- MD Vigo-Guixar ↔ León.
- Rexional Vigo-Urzáiz → A Coruña (exclusivamente neste sentido).
Notas[editar | editar a fonte]
- ↑ "TREN DE ALTA VELOCIDAD AVR S/121 RENFE". www.caf.net (en castelán). Consultado o 2018-01-04.
- ↑ "S-121". www.actren.es (en castelán). Arquivado dende o orixinal o 05 de xaneiro de 2018. Consultado o 2018-01-04.
- ↑ "NEM Solutions, filial de CAF, trabaja en sistemas inteligentes de diagnosis y mantenimiento de trenes". www.vialibre-ffe.com (en castelán). Consultado o 2018-01-04.