Sebastián (santo)

Na Galipedia, a Wikipedia en galego.
  • Este artigo trata sobre o mártir e santo, para o nome de varón véxase Sebastián.
San Sebastián pintado por El Greco entre 1577 e 1578.

Sebastián, coñecido tamén como San Sebastián Mártir, finado contra o ano 288, foi un mártir e santo cristián, que foi supostamente asasinado durante o mandato do emperador romano Diocleciano, perseguidor dos cristiáns. Decote é representado nas artes como un individuo amarrado a un poste e perforado por frechas.

As igrexas católicas celebran o seu día o 20 de xaneiro. A Igrexa Ortodoxa tamén loa este santo.

Vida e morte[editar | editar a fonte]

Nado en Narbona (Francia) no ano 256, educouse en Milán. Cumpría coa disciplina militar, mais non participaba nos sacrificios pagáns por consideralos idolatría. Coma cristián, exercitaba o apostolado entre os seus compañeiros, visitando e alentando a outros cristiáns encarcerados por mor da súa relixión. Acabou por ser descuberto e denunciado ao emperador Maximiano (amigo de Diocleciano), quen o obrigou a escoller entre ser soldado ou seguir a Xesús Cristo.

O santo escolleu seguir a Cristo. Decepcionado, o emperador amenazouno de morte, porén Sebastián mantívose firme na sú fe. Enfurecido, condeouno a morte asetado. Os soldados do emperador levarono ao estadio, espírono, atárono a un poste, e guindáronlle unha choiva de setas, dándoo por morto. Porén, os seus amigos achegáronse e, ao verlo aínda con vida, levárono á casa dunha nobre cristiá romana chamada de Irene ou Erea, dona de Cástulo, que o mantivo agochado e curoulle as feridas até que quedou restablecido.

Os seus amigos aconsellárono de se ausentar de Roma, mais Bastián negouse rotundamente. Presentouse perante o emperador, quen, desconcertado, dábao por morto, e reprochoulle enerxicamente a súa conduta por perseguir aos cristiáns. Maximiano mandou que o zoscasen até morrer, e os soldados cumpriron desta vez sen erros a misión, botando o seu corpo nun lameiro. Os cristiáns recollérono e soterrárono na Vía Apia, na célebre catacumba que leva o nome de San Sebastián. Finou no ano 288.

Galería de imaxes[editar | editar a fonte]

Véxase tamén[editar | editar a fonte]

Ligazóns externas[editar | editar a fonte]