Pedro Pinilla

Pedro Pinilla
Información persoal
Nome	Pedro Martínez Pinilla
Nacemento	25 de outubro de 1895
Lugar de nacemento	Vigo
Falecemento	xaneiro de 1982
Posición	Dianteiro
Carreira sénior
Anos	Equipos	Aprs	(Gls)
	Real Club Fortuna de Vigo
	Real Vigo Sporting Club
1923-1927	Celta de Vigo
1927-1929	Deportivo da Coruña
Selección nacional
	Selección de fútbol de Galicia
Partidos e goles só en liga doméstica. [ editar datos en Wikidata ]

Pedro Martínez Pinilla, nado en Vigo o 25 de outubro de 1895 e finado en xaneiro de 1982, foi un futbolista galego que xogaba na demarcación de dianteiro.

Traxectoria

Antes de xogar no Celta de Vigo xa militara nos dous clubs que deron lugar ao seu nacemento coa súa fusión, o Real Club Fortuna de Vigo e o Real Vigo Sporting Club.

Pinilla tivo a honra de disputar o primeiro encontro oficial da historia do Celta, dito encontro tivo lugar o 7 de outubro de 1923 e foi contra o Unión Sporting Club de Lavadores na fase de clasificación para o Campionato de Galicia de fútbol, e remataría con vitoria do Celta por 2-0 con goles do propio Pinilla e de Luís Correa.

Este dianteiro que logrou un total de 18 goles en 36 encontros oficiais co Celta, foi un home de récords. Por exemplo conseguiu marcar 6 goles nun so encontro, cifra igualada por Manolo Posada e so superada por un home en toda a historia do Celta, Rogelio Tapia, que marcou 8. Esa media ducia de goles marcoullos un 28 de febreiro de 1926 ao Cultural Leonesa en oitavos de final da Copa de España

Nunha época na que non existían tarxetas e non constan moitas expulsións, Pinilla foi expulsado dúas veces. No Celta da década de 1920 só constan outras dúas expulsións, a Lilo e a Polo.

Tamén disputou o primeiro encontro da Selección de fútbol de Galicia o 19 de novembro de 1922 no campo de Coia contra a Selección de Castela. Galicia aliñeou a un gran equipo con: Isidro, Otero, Pasarín, Queralt, Balbino, Pepe Hermida, Moncho, Ramón González, Chiarroni, Polo, e Pedro Pinilla. O encontro rematou con vitoria galega por 4-1, con goles de Polo (2), Pinilla e Ramón.

Pinilla disputou 10 encontros coa Selección galega entre 1922 e 1924 cun balance de 9 vitorias e unha derrota, e anotando 5 goles.

O 1 de maio de 1927 Pinilla disputou o último encontro co Celta, nun empate co Arenas de Getxo na Copa de España. Esa mesma tempada fichou polo Deportivo da Coruña onde xogaría dúas tempadas máis, ata 1929.

Palmarés

Título	Club	Tempada
Campionato de Galicia	Real Vigo Sporting Club	1922-23
Campionato de Galicia	Celta de Vigo	1923-24
Campionato de Galicia	Celta de Vigo	1924-25
Campionato de Galicia	Celta de Vigo	1925-26
Campionato de Galicia	Deportivo da Coruña	1927-28

Véxase tamén

Ligazóns externas

• Berto V. T. (10 de xuño de 2012). "Pedro Pinilla". Yo jugué en el Celta (en castelán).