Nemetatos

Na Galipedia, a Wikipedia en galego.
Localización aproximada da pobo dos Nemetatos na provincia romana da Gallaecia.

Os nemetatos ou nemetati eran un pobo galaico da Gallaecia.

Fontes[editar | editar a fonte]

Apenas son coñecidos senón por unha cita de Ptolomeo, II, 6. 41, que os nomea, en grego, como Nemetatoi, dentro do convento xurídico bracarense. Indica tamén que Volóbriga era a súa capital ou centro.

Identificación[editar | editar a fonte]

Desde que Nicolás Tenorio Cerero, identificara Volóbriga coa localidade actual do Bolo, ao leste da actual provincia de Ourense, son numerosos os autores que repiten tal redución xeográfica, e consecuentemente sitúan os Nemetatos na denominada Terra do Bolo, nun xeito amplo (especialmente os concellos do mesmo Bolo e Viana do Bolo).

Porén, esa teoría esquece que Volóbriga non pode dar O Bolo, pois o -l- intervocálico desaparecería nunha evolución fonética normal. De maneira, que Tenorio só tivo en conta a semellanza fonética do primeiro elemento de Volóbriga para realizar a súa identificación. En segundo lugar, ha terse en conta que os Nemetatos están clasificados como un pobo bracarense, mentres que O Bolo, debeu estar incluído no convento xurídico asturicense, é dicir, dependían de Asturica Augusta, do mesmo xeito que tanto O Bolo como Viana do Bolo, dependen aínda na actualidade, relixiosamente, da diocese de Astorga, a antiga Astúrica, e, practicamente, a maioría dos historiadores admiten unha continuidade xeral, entre o bispado e o antigo convento xurídico, dentro do territorio galego.

Non queda senón recoñecermos que descoñecemos a situación exacta do antigo pobo.

Nome[editar | editar a fonte]

O nome dos Nemetatos, debeu construírse sobre a raíz céltica nemeton "santuario; bosque sagrado", que aparece noutras denominacións da antiga Gallaecia, sendo o máis coñecido o da capital dos tiburos, Nemetobriga; e mesmo, xa en período altomedieval, no do territorio de Nemitos ou Nemetos, que daría lugar ao do arciprestado de Nendos, ao leste da cidade da Coruña.