Manifesto Russell-Einstein

Na Galipedia, a Wikipedia en galego.

O Manifesto Russell-Einstein é un texto redactado por Bertrand Russell e apoiado por Albert Einstein, asinado en Londres o 9 de xullo de 1955. En medio da guerra fría, os asinantes alertaban do perigo da proliferación do armamento nuclear e solicitaban aos líderes mundiais buscar solucións pacíficas aos conflitos internacionais. Foi asinado por once científicos e intelectuais de primeira liña, o máis notábel deles Albert Einstein, uns días antes da súa morte o 18 de abril de 1955. Uns días despois de ser mostrado, o filántropo Cyrus Eaton ofreceuse para organizar unha conferencia en Pugwash, Nova Escocia (Canadá), o lugar de nacemento de Eaton. Sería a primeira das ditas conferencias, que se foron celebrando cada ano desde 1957.

Contexto[editar | editar a fonte]

A primeira explosión nuclear da historia sucedeu o 16 de xullo de 1945 no deserto norte de Alamogordo, Novo México. O 6 de agosto dese mesmo ano, os EUA lanzaron a bomba "Little Boy" en Hiroshima, e tres días despois "Fat Man" en Nagasaki. Polo menos 100.000 civís foron asasinados naqueles dous ataques.

O 18 de agosto de 1945, o Glasgow Forward publicou o primeiro comentario que se conserva de Bertrand Russell sobre as armas atómicas, que comezou a escribir o día en que Nagasaki se bombardeou. Contén as liñas que posteriormente aparecerían no Manifesto:

A perspectiva da raza humana escureceuse máis aló de calquera precedente. A humanidade enfróntase a unha clara alternativa: Ou ben morremos todos ou ben adquirimos un lixeiro grao de sentido común. Un novo pensamento político será necesario se se quere evitar o desastre final.

Despois de saber do bombardeo de Hiroshima e vendo a inminente escalada armamentística nuclear, Józef Rotblat, o único científico que abandonou o Proxecto Manhattan por cuestións morais, afirmou que se achaba totalmente preocupado polo futuro da humanidade.

Nos anos seguintes, Russell e Rotblat traballaron para evitar a proliferación nuclear, colaborando con Albert Einstein e outros científicos para finalmente constituír o Manifesto Russell-Einstein.

O manifesto[editar | editar a fonte]

O manifesto revelouse nunha conferencia de prensa no Caxton Hall, Londres, presidida por Rotblat. Russell comezou a conferencia dicindo:

Traio a advertencia pronunciada polos signatarios á atención de todos os gobernos de grande alcance do mundo coa esperanza seria de que poden acordar permitir que sobrevivan os seus cidadáns.

No mencionado manifesto chama os científicos a unha conferencia onde se puidesen tratar os perigos das armas de destrución masiva, enfatizando que tales reunións fosen politicamente neutrais. Estendíase a cuestión do armamento nuclear a todos os países e gobernos. Unha frase en concreto menciónase a miúdo, pronunciada por Rotblar ao recibir o Premio Nobel da Paz en 1995:

"Recordade a vosa humanidade e esquecede o resto".

O comezo das Conferencias de Pugwash[editar | editar a fonte]

A chamada á conferencia internacional era clara no manifesto e Nehru pretendeu que fose na India. Porén, o risco da crise de Suez retardouna. Aristóteles Onassis ofreceuse para financiar a reunión en Mónaco, mais rexeitouse tal proposta. No seu lugar, Cyrus Eaton, un industrial canadense que coñecía a Russell desde 1938 financiou a conferencia no seu Pugwash natal. O Manifesto Russell-Einstein converteuse na carta de fundación das Conferencias de Pugwash.

Asinantes do manifesto[editar | editar a fonte]

Véxase tamén[editar | editar a fonte]

Outros artigos[editar | editar a fonte]

Ligazóns externas[editar | editar a fonte]