Lago Alberte

Na Galipedia, a Wikipedia en galego.
Lago Alberte, Uganda (fotografía da NASA, 2003).

O Lago Alberte, Albert Nyanza ou Lago Mobutu Sese Seko é un lago que está situado na África Central, no Gran Val do Rift, ao oeste de Uganda. Serve de fronteira coa República Democrática do Congo. Neste lago desemboca o río Nilo chegando desde o seu nacemento no Lago Vitoria e volve saír outra vez dirección norte, camiño do Mediterráneo.

Está situado a unha altitude de 615 metros, ten unha área de 5.300 km², con 160 km de longo e 30 km de largo e unha profundidade máxima de 58 m.

Foi descuberto para o mundo branco en 1864 por Samuel White Baker, na súa viaxe de busca do nacemento do río Nilo, poñéndolle o nome en honra do príncipe Alberte, consorte da raíña Vitoria.