Xosé Antonio Sánchez Bugallo

Xosé Antonio Sánchez Bugallo

(2008)
Biografía
Nacemento	31 de xaneiro de 1954 (70 anos) Teixeiro, España
Alcalde de Santiago de Compostela
15 de xuño de 2019 – 17 de xuño de 2023 ← Martiño Noriega – Goretti Sanmartín →
Deputado do Parlamento de Galicia
15 de novembro de 2012 – 21 de outubro de 2016 Circunscrición electoral: Circunscrición electoral da Coruña
Alcalde de Santiago de Compostela
1999 – 2011 ← Xerardo Estévez – Gerardo Conde Roa →
Concelleiro do Concello de Santiago de Compostela
23 de xuño de 1987 – 15 de novembro de 2012
Actividade
Ocupación	político
Partido político	Partido Socialista Obrero Español
Membro de	Partido dos Socialistas de Galicia

Xosé Antonio Sánchez Bugallo, nado o 31 de xaneiro de 1954 en Teixeiro (Curtis), é un político galego do PSdeG-PSOE.

Carreira política

Chegou a Santiago de Compostela en 1981, e en 1983 comezou a súa vida política como xefe de gabinete do alcalde socialista naquel momento, Xerardo Estévez. Nas eleccións municipais de 1987 saíu elixido concelleiro, e desde entón ata 1998 asumiu diferentes delegacións municipais como Deportes, Relacións Veciñais, Tráfico e Seguridade Cidadá, Persoal e Réxime Interior, ademais da portavocía do seu grupo. Entre 1991 e 1999 foi deputado na Deputación da Coruña, exercendo como vicepresidente entre 1991 e 1995, á fronte das áreas de Persoal e Réxime Interno.

Accedeu á Alcaldía en 1998, despois da renuncia de Xerardo Estévez. Nas eleccións municipais de 1999, 2003 e 2007 conservou a alcaldía mediante un goberno de coalición co BNG. Porén, nas eleccións municipais de maio de 2011 o conservador Gerardo Conde Roa obtivo maioría e acadou a alcaldía.

Foi nas listas do PSdeG-PSOE nas eleccións autonómicas de 2012, e saíu elixido deputado. Como parlamentario presidiu a Comisión de Economía, Facenda e Orzamentos; e foi portavoz da Comisión de Ordenación do Territorio, Urbanismo e Vivenda. En 2015 ocupou simbolicamente o derradeiro posto na lista do seu partido, que desta volta presentaba a Francisco Reyes como candidato. Encabezou de novo as listas do seu partido nas eleccións municipais de 2019, pasando a gobernar con maioría simple tras acadar dez concelleiros, substituíndo na alcaldía a Martiño Noriega. En 2023 perdeu a alcaldía, que pasou a mans da nacionalista Goretti Sanmartín, renunciando como concelleiro. Presentouse como candidato socialista ao Senado nas eleccións xerais de España de 2023 e foi elixido senador.

Resultados electorais

• Eleccións 1999: 16 208 votos (33,24 %) e 9 concellarías.
• Eleccións 2003: 20 481 votos (40,32 %) e 11 concellarías.
• Eleccións 2007: 18 270 votos (38,19 %) e 10 concellarías.
• Eleccións 2011: 14 846 votos (30,96 %) e 9 concellarías.
• Eleccións 2019: 18 150 votos (34,70 %) e 10 concellarías.
• Eleccións 2023: 10 513 votos (21,66 %) e 6 concellarías.

Outros cargos

Dende 1999, foi membro do Consello de Administración da Organización de Cidades Patrimonio Mundial (OCPM), presidente da Mancomunidade de Concellos da Comarca de Santiago de Compostela que abrangue os municipios de Ames, Brión, Boqueixón, Teo, Val do Dubra e Santiago de Compostela, e desde maio do 2005 presidiu a Conferencia de Cidades do Arco Atlántico, organismo internacional formado por cinco cidades británicas, trece do Estado español, seis portuguesas, unha irlandesa e nove francesas.

Véxase tamén

Outros artigos

• Eleccións municipais en Santiago de Compostela
• Lista de senadores galegos desde a Transición

Ligazóns externas

• Ficha no Parlamento de Galicia Arquivado 02 de abril de 2015 en Wayback Machine.
• Grupo municipal dos socialistas de Santiago. Arquivado 15 de maio de 2021 en Wayback Machine.