Xosé Fontenla Leal

Na Galipedia, a Wikipedia en galego.
Saltar ata a navegación Saltar á procura
Xosé Fontenla Leal
José Fontenla Leal.jpg
Nacemento12 de febreiro de 1864
 Ferrol
Falecemento5 de decembro de 1919
 A Habana
NacionalidadeEspaña
editar datos en Wikidata ]

Xosé María Benito Fontenla Leal, nado en Canido, Ferrol o 12 de febreiro de 1864 e finado na Habana o 5 de decembro de 1919, foi un intelectual galeguista, presidente da Unión Redencionista Gallega e impulsor da Real Academia Galega, institución da que foi académico non numerario. Pertenceu así mesmo á masonería e adoptou o nome masónico de Murguía.

Traxectoria[editar | editar a fonte]

Emigrou a Cuba xunto aos seus pais. Na Habana traballou na industria litográfica. Foi un auténtico bibliófilo, chegando a reunir unha biblioteca de máis de tres mil volumes sobre historia, xeografía, lingua, artes e tradicións de Galicia.

En 1886 funda, xunto con Secundino Cora García, a Revista de Galicia, publicación mensual bilingüe de curta duración. Tamén foi colaborador do Diario de la Marina. En xaneiro de 1903 faise socio do Centro Gallego de La Habana e durante varios anos foi bibliotecario da sección de instrución. En 1917 foi comisionado polo Centro Gallego para acompañar a Galicia os restos mortais do músico José Castro "Chané". Foi presidente da sociedade Unión Redencionista Gallega, encargada de apoiar o movemento agrarista en Galicia.

Contribuíu decisivamente á fundación en 1905 da Asociación Iniciadora y Protectora de la Academia Gallega canda o poeta Manuel Curros Enríquez. Nesta sociedade, xénese da futura Real Academia Galega, Fontenla ocupou os postos de vogal, vicepresidente e presidente. Despois foi tamén académico non numerario da RAG.

Tivo unha destacada presenza na formación da sociedade Ferrol y su Comarca; na xunta xeral de xullo de 1909 foi elixido por unanimidade para organizar a súa sección de propaganda.

Morreu no hospital Calixto García en 1919. As dificultades económicas privárono da condición de socio do Centro Gallego e, polo tanto, da posibilidade de ingresar no sanatorio La Benéfica. Rematou soterrado nunha foxa común do cemiterio Colón da Habana.

Boa parte da súa extensa biblioteca consérvase no Centro Gallego de La Habana. Trala súa morte, o resto foi doado polo seu fillo á Academia Galega.

Himno Galego[editar | editar a fonte]

Dende Cuba interviu na fixación dun dos símbolos nacionais de Galicia. Fontenla Leal promoveu a elaboración do himno galego, pois escribiu en varias ocasións a Eduardo Pondal e Pascual Veiga instándoos a que lle enviasen a letra e a música. A composición estreouse finalmente na Habana o 20 de decembro de 1907.

Véxase tamén[editar | editar a fonte]

Bibliografía[editar | editar a fonte]

Outros artigos[editar | editar a fonte]

Ligazóns externas[editar | editar a fonte]