Xoán Hermida

Xoán Hermida

Biografía
Nacemento	12 de novembro de 1965 (60 anos) Pontevedra
Actividade
Ocupación	político
Partido político	Partido Comunista do Pobo Galego Espazo Ecosocialista Galego Esquerda de Galicia En Marea

Xoán Hermida González, nado en Pontevedra o 12 de novembro de 1965, é un historiador, analista político e activista social galego. Ten numerosas publicacións de libros e artigos de fondo. Colaborador habitual de diferentes medios dixitais e en papel. Foi socio fundador de Atlántica de Comunicacións S.L. e membro do Consello de redacción da revista Altermundo, mantendo unha colaboración periódica nos xornais dixitais Praza Pública e InfoLibre.

Traxectoria

Licenciado en Historia Contemporánea e Posgrao en Filosofía pola Universidade de Santiago de Compostela. Doutorouse en Xestión Pública pola USC cunha tese sobre Altermundismo en Galicia (MOVEMENTOS SOCIAIS E ALTERMUNDISMO EN GALICIA: DE NUNCA MÁIS A AGE 2002-2012) co-dirixido por Ramón Maiz e Nieves Lagares. Especialista no pensamento de Karl Marx, realizou estudos de marxismo no Instituto adxunto ao CC do PC de Checoslovaquia durante o período da perestroika. O seu coñecemento sobre este pensador é unha constante na súa traxectoria dende un marxismo ortodoxo a unha afinidade co autor nunha distancia coa doutrina marxista. Froito desa traxectoria vital e intelectual é a publicación do libro Un gigante entre pigmeos.

Iniciou a súa actividade política en ERGA, posteriormente nos CAF e nos Comités Anti-Otan. Participando durante a mocidade no PCPG (e posteriormente en Iniciativa Democrática, coa que formou parte da coalición EU-UG nas eleccións ao Parlamento galego de 1993). Foi membro do Consello Confederal da CXTG, secretario de Organización de Esquerda de Galicia e coordinador do Grupo Mixto no Parlamento de Galicia (1997-1999).

Activista social, foi director e fundador da ONG Amarante-Setem (1999-2007), pioneira no Comercio Xusto en Galicia (no 2000 abriu A Factoria do Sur en Pontevedra). Dende Amarante liderou en Galicia a campaña internacional Clean Clothes Campaing sobre os dereitos humanos e ambientais na produción do mercado téxtil globalizado, poñendo no foco a responsabilidade social corporativa de empresas como Adolfo Domínguez ou Inditex.

A calor do movemento 15M foi un dos promotores da Iniciativa BenComún. Coordinador do Espazo Ecosocialista Galego entre febreiro de 2012 e xuño de 2015, sendo substituído por Manel Cardoso Santiago. Como responsable de Espazo Ecosocialista Galego participou na formación de Compromiso por Galicia e de AGE.

Concorreu ás Eleccións ao Parlamento de Galicia de 2016 no número sexto das listas de En Marea pola circunscrición de Pontevedra, pero non resultou elixido. En abril de 2018, e logo da dimisión do parlamentario Juan Merlo, pasou a formar parte do Parlamento de Galicia. Pese a anunciar a súa intención de non formar parte do parlamento adquiriu a súa condición de parlamentario coa intención anunciada de dimitir definitivamente en canto En Marea puxera en marcha un proceso de consulta as persoas inscritas sobre o posible incumprimento do código ético por parte da deputada Paula Quinteiro. Tras 12 días, e unha vez convocada por En Marea a consulta, presentou a súa renuncia diante da Mesa do Parlamento de Galicia.

Nas eleccións internas de En Marea celebradas o 22 e 23 de decembro de 2018 resultou elixido membro do Consello das Mareas dentro da lista Coidando a Casa que encabezaba o portavoz de En Marea, Luís Villares. Foi designado responsable de análise político e estratéxico da Coordinadora de En Marea.

En maio de 2019 abandonou a militancia partidaria definitivamente, realizando unha análise moi crítica do que veu sendo en chamar a 'nova política' que se plasmou no libro A saida da encrucillada. Dende febreiro de 2016, dirixe o Foro OBenComún de pensamento crítico.

Obra

Ensaio

• Verbas de Vieiros. Obencomún, (2009) ISBN 978-84-616-2532-1
• [Re]construír a esquerda nacional. Da Rolda de Rebeldía a AGE. Obencomún, (2013) ISBN 978-84-616-4481-0
• Galicia no labirinto da nova política, de Nunca Máis ás Mareas. Ed. Galaxia, (2018) ISBN 978-84-9151-185-4
• A Saída da encrucillada. Epitafio para a 'nova política' en Galicia. Obencomún, (2021) ISBN 978-84-123275-6-4
• En defensa de la democracia [real]. Obencomún (2024) ISBN 978-84-09-66174-9
• Un gigante entre pigmeos; rescatar a Marx de los "marxistas". Servizos de publicacións da UdeV (2024) ISBN 978-84-1188-022-0

Obras colectivas

• Galicia Solidaria. Xulio Ríos e Carlos Teijo (eds), Edicións Xerais, (2009) ISBN 978-84-9782-980-9
• 15M: O pobo indignado. Alfredo Iglesias (Coord.), Edicións Laiovento, (2011) ISBN 978-84-8487-216-0
• Ecoloxía Política: Olladas desde Galicia. Xan Duro e Xoán Hermida (Coords), ObenComún (2015). ISBN 978-84-606-5931-0
• [Re]pensar a democracia. Obencomún (2017). ISBN 978-84-697-4104-7
• Adeus ás armas: Que foi do pacifismo?. ObenComún (2022) ISBN 978-84-09-46493-7
• Abajo las armas; 32 miradas incomodas. Alvarellos Editora / Fundación cultura de paz (2023) ISBN 978-84-18567-40-7

Véxase tamén

Ligazóns externas

• Bitácora de Xoán Hermida
• Artigos en Praza Pública
• Artigos Arquivado 03 de febreiro de 2019 en Wayback Machine. en Galicia Confidencial
• https://especiales.publico.es/opinion/firma/xoan-hermida Arquivado 30 de outubro de 2021 en Wayback Machine.