Os Peares

Na Galipedia, a Wikipedia en galego.
Saltar ata a navegación Saltar á procura

Coordenadas: 42°27′13.95″N 07°43′57.93″O / 42.4538750, -7.7327583 Os Peares é un núcleo de poboación galego repartido entre catro parroquias de catro concellos pertencentes a dúas provincias. Oficialmente[1], con este nome existen unha parroquia do concello ourensán da Peroxa e o único lugar desta parroquia. Por extensión úsase este topónimo para referirse ao núcleo de poboación que forman a parroquia e lugar anteriormente mencionados, máis os lugares do Coitelo no tamén ourensán concello de Nogueira de Ramuín, A Granxa no concello lugués de Carballedo e O Torrón no tamén concello lugués de Pantón. En 2015, segundo datos do IGE[2], tiña 155 habitantes, dos cales 78 eran homes e 77 mulleres. Os lugares máis poboados son Os Peares con 68 habitantes e A Granxa con 61, pola contra o lugar do Torrón é o menos poboado con 5 habitantes.

Xeografía[editar | editar a fonte]

Desembocadura do Sil (ó fondo) no Miño (á esquerda, baixo a ponte do ferrocarril)

O lugar dos Peares está situado na desembocadura dos ríos Sil e Búbal no Miño, e cruzado por ambos os tres ríos. É un lugar de fortes pendentes, posto que o núcleo está situado nun punto onde os ríos baixan encaixados.

Existen desde hai tempo dúas importantes pontes que atravesan o núcleo, unha que cruza o Sil en dirección norte-sur, e outra que atravesa o Miño en sentido leste-oeste. A primeira é para o tráfico de automóbiles, mentres que a segunda é para o ferroviario, pois a estación dos Peares era unha parada importante na liña entre Ourense e Monforte de Lemos. En setembro de 2016 abriuse unha nova ponte sobre o Miño que con case 200 metros de longo e 5 de ancho posibilita o uso compartido por parte de vehículos e peóns[3].

Administración[editar | editar a fonte]

O núcleo dos Peares divídese administrativa e eclesiasticamente entre catro parroquias de catro concellos das provincias de Lugo e Ourense. Ditas parroquias son: na provincia de Ourense Os Peares do concello da Peroxa e Viñoás do concello de Nogueira de Ramuín, e na de Lugo Oleiros do concello de Carballedo e Pombeiro do concello de Pantón.

Deporte[editar | editar a fonte]

Os Peares é o punto de partida da tradicional proba anual de piragüismo do Descenso do Miño, con chegada no encoro de Velle en Ourense[4].

Galería de imaxes[editar | editar a fonte]

Notas[editar | editar a fonte]

  1. Xunta de Galicia (ed.). "Nomenclátor, busca directa". Consultado o 5 de febreiro de 2016. 
  2. Instituto Galego de Estatística (ed.). "Nomenclátor, busca por entidades. Ano 2015". Consultado o 5 de febreiro de 2016. 
  3. "Ábrese ao tráfico a nova ponte sobre o río Miño". La Voz de Galicia. Consultado o 07/10/2018. 
  4. Faro de Vigo, ed. (26/6/2015). "El Descenso do Miño reúne a 40 clubes del noroeste peninsular" (en castelán). Consultado o 5 de febreiro de 2016. 

Véxase tamén[editar | editar a fonte]