Luis José Díaz Salas

Luis José Díaz Salas
Luis José Díaz Salas
Nacemento	1967
Área	Deseño de moedas.
Obras	Anverso español das moedas de un e de dous euros.
Nacionalidade	Española
Cónxuxe	Begoña Castellanos García
	[ editar datos en Wikidata ]

Luis José Díaz Salas, nado en 1967, é un deseñador de moedas español, coñecido pola súa imaxes dos reis Xoán Carlos I e Filipe VI nos anversos das moedas de un e de dous euros de España.

Traxectoria[editar | editar a fonte]

Luis José Díaz Salas leva traballando desde 1986 como deseñador e gravador de moedas na Real Casa da Moeda - Fábrica Nacional de Moeda e Timbre (FNMT), de Madrid,^[1] igual que a súa esposa, Begoña Castellanos.^[2] Díaz Salas é autor de máis dun cento de moedas, tanto circulantes como conmemorativas, dos sistemas da peseta e do euro.^[3]^[4]

En 1987 creou o seu primeiro deseño para a FNMT, o reverso da moeda de 500 pesetas,^[5] que en 1993 incorporou a novidade técnica coñecida como "imaxe latente", para dificultar a falsificación.^[6] Durante a década de 1990 creou varias das moedas máis populares de curso legal en España co seu valor en pesetas, así como un bo número de moedas conmemorativas.^[2]^[4]

Coa chegada do euro, o seu deseño co busto do rei Xoán Carlos I foi o escollido para os anversos da serie de moedas bimetálicas de un e de dous euros, que comezaron a cuñarse en 1999. De igual xeito, a el débeselle tamén o busto de Filipe VI emitidas a partir de 2015. Ademais, foi o creador de varias moedas conmemorativas en euros cuñadas pola RCM-FNMT destinadas especificamente ao coleccionismo e ao investimento,^[4] entre elas a de 30 euros emitida con motivo da entronización de Filipe VI, a primeira conmemorativa a nome do novo monarca.^[7]^[3]