Jon Idigoras

Para outras páxinas con títulos homónimos véxase: Idígoras.

Jon Idigoras

Biografía
Nacemento	3 de maio de 1936 Amorebieta-Etxano, España
Morte	3 de xuño de 2005 (69 anos) Bilbao, España
Causa da morte	Enfisema pulmonar
Deputado no Congreso dos Deputados
28 de xuño de 1993 – 9 de xaneiro de 1996 Lexislatura: V lexislatura de España Circunscrición electoral: Biscaia Electo en: Eleccións Xerais 1993 en España
Deputado no Congreso dos Deputados
20 de novembro de 1989 – 13 de abril de 1993 Lexislatura: IV lexislatura de España Circunscrición electoral: Biscaia Electo en: Eleccións Xerais 1989 en España
Deputado no Congreso dos Deputados
8 de xullo de 1986 – 2 de setembro de 1989 Lexislatura: III lexislatura de España Circunscrición electoral: Biscaia Electo en: Eleccións Xerais 1986 en España
Deputado do Parlamento do País Vasco
22 de marzo de 1984 – 9 de xullo de 1986 Lexislatura: II lexislatura do Parlamento Vasco Circunscrición electoral: Áraba
Deputado do Parlamento do País Vasco
31 de marzo de 1980 – 19 de xaneiro de 1984 Lexislatura: I lexislatura do Parlamento Vasco Circunscrición electoral: Biscaia
Deputado do Parlamento Vasco na primeira lexislatura
Actividade
Lugar de traballo	Madrid
Ocupación	político
Partido político	Herri Batasuna
Membro de	Langile Abertzaleen Batzordeak

Jon Idigoras Gerrikabeitia, nado en Amorebieta, Biscaia, o 3 de maio de 1936 e finado en Deusto, Bilbao, en 2005, foi un sindicalista e político vasco e dirixente histórico da coalición Herri Batasuna.

Traxectoria

Comezou a traballar como obreiro metalúrxico aos 14 anos na factoría de IZAR de Zornotza. Afeccionado aos touros dende mozo, Idigoras chegou a tourear nalgunhas prazas vascas, e no mundo taurino chegóuselle a coñecer como Chiquito de Amorebieta, Chiquito de Eibar ou Morenito del Alto.^{[Cómpre referencia]} Comezou como subalterno na cuadrilla do Duque de Boroa. En 1976 foi un dos fundadores do sindicato abertzale Langile Abertzaleen Batzordeak. Estivo na cadea durante a ditadura de Franco e posteriormente exiliouse.

En 1978 iniciou a súa actividade política pública en Altsasu (Navarra) como fundador de Herri Batasuna.^{[Cómpre referencia]} Foi integrante da Mesa Nacional da formación entre 1978 e 1995 e portavoz desta coalición. Como voceiro da esquerda independentista radical na década dos 80 foi denunciado en numerosas ocasións polas súas declaracións, concretamente ante o Tribunal Supremo que chegou a tramitar até catro procesos ao mesmo tempo contra el.^{[Cómpre referencia]} Tamén pasou por moitos xulgados a declarar sobre a súa relación con Euskadi Ta Askatasuna. En tódolos casos saíu absolto.

O 20 de novembro de 1989 foi testemuña do atentado perpetrado en Madrid por asasinos a soldo de ultradereita española contra dos deputados de Herri Batasuna no Congreso, no que foi asasinado Josu Muguruza e ferido moi grave Iñaki Esnaola. Idigoras saíu ileso porque a arma que lle apuntaba encalouse.^{[Cómpre referencia]} Foi á cadea xunto ao resto de membros da Mesa Nacional de HB, por orde do maxistrado da Audiencia Nacional Baltasar Garzón, acusado de colaboración con ETA. Saíu en liberdade provisional, a causa da doenza que padecía.

En 1999 publicou as súas memorias: El hijo de Juanita Gerrikabeitia (Editorial Txalaparta). Nos seus últimos anos, a gravidade do seu estado de saúde fixo que pasase a ser considerado como un histórico dos sucesivos partidos arredor dos cales vai agruparse a esquerda abertzale. A súa presenza viuse limitada a aparecer en manifestacións, artigos en xornais afíns e algunhas roldas de prensa, especialmente logo da ilegalización de Batasuna. A súa derradeira comparecencia importante foi a intervención que realizou no mitin que Batasuna celebrou no velódromo de Anoeta (Donostia) o 14 de novembro de 2004, no cal fíxose pública a Proposta de Anoeta.

Pasamento

Idigoras atribuía a súa doenza á gran cantidade de cigarros que fumara durante anos, hábito polo cal se vai arrepentir na súa última época. Jon Idigoras morreu a causa dunha doenza pulmonar crónica ás once e media do 3 de xuño de 2005 na Clínica San Sebastián de Deusto (Bilbao). A súa capela ardente foi instalada no salón de actos da Casa do Concello de Amorebieta grazas a un acordo do goberno municipal (coalición Partido Nacionalista Vasco-Eusko Alkartasuna).