Cardiomegalia

---

Este artigo sobre medicina é, polo de agora, só un bosquexo. Traballa nel para axudar a contribuír a que a Galipedia mellore e medre.  Existen igualmente outros artigos relacionados con este tema nos que tamén podes contribuír.

---

Cardiomegalia
Clasificación e recursos externos
Cardiomegalia nunha radiografía de tórax, amosando tamén un marcapasos artificial.
ICD-10	I51.7
ICD-9	429.3
DiseasesDB	30769
MeSH	D006332
Aviso médico. Advertencia: A Wikipedia non dá consellos médicos. Se cre que pode requirir tratamento, por favor, consúltello ao médico.

A cardiomegalia é un termo empregado en medicina para describir o agrandamento anormal do corazón ou hipertrofia cardíaca. Trátase dun signo que adoita aparecer en persoas con insuficiencia cardíaca crónica, ademais de outros tipos de miocardiopatías.

Pode ser unha manifestación da doenza de Wernicke.

Clasificación

A cardiomegalia pode afectar a un ou ambos ventrículos ou aurículas. Habitualmente clasifícase do seguinte xeito:

• Cardiomegalia por dilatación, que deriva dun dano que debilita o músculo cardíaco, como un ataque ao corazón.
• Cardiomegalia por hipertrofia: o máis habitual é que a hipertrofia sexa do corazón esquerdo, ou en casos máis graves, de todo o corazón. Porén, existen determinadas doenzas nas que existe unha hipertrofia illada de algunha das cámaras cardíacas:
  • Hipertrofia auricular, ben sexa esquerda ou dereita.
  • Hipertrofia ventricular:
    • Hipertrofia ventricular esquerda, que puede derivar de hipertensión arterial de longo tempo de evolución.
    • Hipertrofia ventricular dereita, que pode producirse por hipertensión pulmonar, ou en casos de hipertrofia ventricular esquerda de anos de evolución.

Sintomatoloxía

A cardiomegalia implica, pola súa definición, que a mecánica de latexo do corazón estea alterada, isto é, o corazón terá problemas para bombear o sangue ao resto do corpo. Isto acrecéntase en situacións de esforzo físico. Así, os principais síntomas indicativos de cardiomegalia son:

• Astenia ou cansanzo.
• Mareos.
• Tose improdutiva.
• Dificultade para respirar, a respiración é acelerada e con sensación de falta de folgos.
• Trastornos do ritmo cardíaco, como arritmias, aumento do ritmo cardíaco taquicardia ou palpitacións.
• Edema, sobre todo nos pés e nocellos.

Diagnóstico

En moitas ocasións unha simple exploración física dos signos e síntomas abonda para diagnosticar ou sospeitar cardiomegalia. As flutuacións do pulso, a tose e sobre todo a dificultade respiratoria orientan o diagnóstico de cardiomegalia. O xeito máis doado de observar a cardiomegalia é mediante unha radiografía simple do tórax. A definición radiolóxica de cardiomegalia é unha silueta cardíaca (corazón) que ocupa máis da metade do espazo que o que ocupan a suma dos dous pulmóns. O electrocardiograma é útil para determinar se hai trastornos do ritmo cardíaco típicos da cardiomegalia, como a taquicardia ou outras arritmias. Tamén pode facilitar o diagnóstico da doenza subxacente, isto é, da patoloxía de base que está a causar o agrandamento do tamaño do corazón, como pode ser a insuficiencia cardíaca ou as cardiomiopatías. Outras probas de utilidade son a TAC, o ecocardiograma, o cateterismo cardíaco ou a proba de esforzo.

Tratamento

O tratamento da cardiomegalia ha de enfocarse a tratar a causa que a provoca. Así, se se determina que a cardiomegalia está a ser causada por unha insuficiencia cardíaca, o tratamento ha de ser o específico para esta doenza, isto é, diuréticos, IECAs, digoxina, etc. A cirurxía é en ocasións unha solución válida.

Véxase tamén

Outros artigos

• Insuficiencia cardíaca
• Megalia
• Cardiomiopatía

Ligazóns externas

• youtube.com Vídeo explicativo da cardiomegalia.